Виктория Королева чужис-быдмис Улыс Вочын. Школа эштöдöм бöрын мунiс велöдчыны Питирим Сорокин нима Сыктывкарса государственнöй университетö коми кафедраö. Лоас коми да англия кывъяс велöдысьöн. Велöдчö бöръя витöд во.

 — Ичöтсянь, «Оз тусь» садйö ветлiгöн на, вöлi зэв водзмöстчысьöн, быдтор вылö кокниа кыпалысьöн. Радейтi и йöктыны, и сьывны, — сёрнитiс Виктория. — Пырöдчылiм конкурсъясö, петкöдчылiм и Кулöмдiнын, вылö донъявлiсны миянöс. Гырысь классъясын нин школаö локтiс том велöдысь Галина Ивановна Литош. Сiйö босьтчис волонтёравны, ышöдiс и миянöс, челядьöс. Отсасим олöмаяслы, праздникъяс дырйи гажöдiм сиктсаясöс да вöчим мукöд удж.

 11 класс, колiс сдайтны экзаменъяс. Вика эз на тöд, кытчö мунас водзö. Коми кыв велöдысь Татьяна Григорьевна Морохина вöзйис коми да англия кывъяс велöдысьлысь удж. Ныв эз куж мöвпыштны, кыдз учительлы позьö сетны тöдöмлун öтпырйö кык кывйысь. Документъяс сетiгöн шуисны, мый университетö пыригöн ковмас сдайтны коми кывйысь экзамен. Татьяна Григорьевна отсалiс дасьтысьны экзамен кежлö. Быд лун Виктория волывлiс велöдысь дорö гортас да кывзiс, аслыс тетрадьö пасъялiс висьталöмсö. Весиг гортса удж сетлывлiс.

— Воис кад мунны карö сдайтны экзамен, — водзö сёрнитiс Вика. — Тöдмаси тайö жö кафедраö пырны окотитысьяскöд, кутiм ёртасьны. Экзаменлысь кывкöртöд колiс виччысьны некымын лун. Вочö кайöм бöрын ёна мöвпалi, а ог кö веськав, кытчö, эськö, муна? Кöсйи велöдчöм бöрын локны чужан сиктö, а кыдзи нö абу кö велöдысьöн. Нöшта на и велöдысьясыд сиктад оз тырмыны.
Ёна зiльöмöн да велöдысьлöн отсöгöн Виктория босьтiс 90 сайö балл, тайö ыджыд вермöм.

 — Миян коми кафедраын пырис нин олöмö, мый быд во котыртам «Тöдмасян рыт». Коркö ар помас нин, кор выль локтысь студентъяс пырöдчöны велöдчöмас, чукöртчам медводдза восянь бöръяöдзыс став велöдчысьыс да тöдмасям öта-мöднымкöд. Локтöны и велöдысьяс, и тшöтш найö, кодъяс петiсны нин университетысь. Юам чай, сэсся петкöдлам гаж кежлö лöсьöдöмторъяс. Ворсам öта-мöдкöд, сьылам да йöктам. Снимайтам телефонъяс вылö асланым группа йылысь кино либö дасьтам сьыланкыв, и ставсö комиöн. Рытыс кольö зэв гажаа да кыпыда, и быттьö важöнсянь нин тöдсаöсь öта-мöдкöд. Пасъя, татшöм рытыс сöмын коми кафедраын велöдчысьяслöн. Эска, мый оз кус лöсьöдöмыс. А тавосянь сюйим нöшта на öти выльтор — öтлаын вочаалам Выль во. Ме кöсъя, медым том войтыр эз яндысьны, сёрнитiсны чужан кыв вылын, — кыпыд руöн висьталiс ныв.

Сентябр 2023-öд восянь велöдöны журналистö. Викториялы тшöтш лоис окота асьсö видлыны тайö туйвизяс. Коми кывйыс весиг ышöдiс гижны кывбуръяс, но эз на йöзöдчы. Велöдчöмысь öтдор во джын сайын пырис уджавны «Йöлöга» журналö. Вöзйис медшöр редакторыс, да Вика эз бöрыньт.

 — Планёрка вылын сёрнитам, кодi мый гижас, мый урчитам тайö тöлысь кежлас, — водзö сёрнитiс Виктория. — Быдöн бöрйöм тема серти корсьö мортöс, сёрнитчö да ветлö сы дорö. Коми журнал, да гöгöрвоана, гижам комиöн. Пырöдчи, да сьöлöм серти тайö уджыс. Велöдчöм помалöм бöрын сьöкыд лоö бöрйыны, кайны чужан сиктö да велöдны челядьöс либö кольччыны карö да пырöдчыны журналистъяслöн уджö.
Мöвпыштны кадыс эм на. Водзын экзаменъяс, ковмас дасьтысьны, гижны диплом да с.в.

 Алёна Ермакова.

 Снимок Виктория Королевалöн.