Кыпыд лолöн

Озъягын «Кык кодзув» кыкöн сьылысьяслöн конкурсын вермисны Кулöмдiнса шöр школаысь велöдысьяс Надежда Васильевна Булышева да Ольга Борисовна Ракина. Дуэтыслöн нимыс «Мечта». Кольöм воын найö жö петкöдчисны Дон сиктлöн тшупöда паса гажын.

— Во вит сайын Ольга Борисовнакöд сёрнитчим да школаын лöсьöдiм татшöм жö нима сьылан котыр. Локтiсны сьывны радейтысьяс да окотитысьяс. Лов кыпöдöмнад кыпыда жö и уджавсьö. Петкöдчим школаын мунысь гажъясын. Сентябр öтикöд лунö Ольга Борисовнакöд школалысь öдзöсъяс кыпыда восьтiм сьыланкывйöн жö, кöсъям тайö выльторсö пыртны олöмö. Ме дзолядырсянь öкмысöд классöдз ветлöдлi «Козин» котырö, кодöн веськöдлiс Нина Антоновна Лодыгина, казялiс да пестiс сиктса челядьлысь енбиалунсö, сьывны радейта и öнi на, — сёрнитiс Надежда Васильевна.

Кольöм вося гожöмын Керчомъяын «Пыжа гаж» дырйи «Коми ань» конкурсын донъялiсны Надежда Васильевнаöс медся вылö. Пöчыслöн кольöм нэмся ас вöчöм дöраысь вурöм сарапанöн йöктiс «Шондiбан», öти сайын висьталiс коми аньлöн вöччанног йылысь. Пырöдчö и лыжиöн исласьны радейтысьяслöн Кадамса марафонö.

Водзмöстчö и аслас медшöр уджын — челядьöс велöдöмын, найö быд бурас ышöдöмын. Ас кадö помалiс Сыктывкарса университет. Школаын велöдчигöн на Ирина Андреевна Кузнецова велöдысьыс вöзйис гижны рöдвуж йылысь. Дасьтöм уджнас нывка петкöдчис республикаса олимпиадаын да босьтiс медводдза места. Тайö вермöмыс и йиджтiс муслун кывъяс пыдiсянь велöдöм дорö. И эз весьшöрö велöдчы филологö, да со квайт во нин Кулöмдiнса шöр школаын роч кыв да литератураысь сетö урокъяс. А витöд-квайтöд классъясын нöшта, и рочöн кö, основы духовно-нравственной культуры народов России.

Надежда Васильевна нöшта классöн веськöдлысь. Уджö босьтчöмсянь и сетiсны витöд класс. Аддзи пö, кыдзи быдмисны челядь, накöд пö тшöтш сöвми да пырöдчи школалöн олöмö. Кольöм воын найö помалiсны öкмысöд класс, да тайö велöдчан во панассянь бара босьтiс витöд класс. Дерт, эмöсь вильыш и шаньöсь, налöн вежласьöны кöсйöмъясныс да видзöдласъясныс, колö пö гöгöрвоны, кывны да кывзыны быдöнöс. Аттьöалö челядь вöсна тöжда, быд босьтчöмын отсасьысь бать-мамöс, уджъёртъясöс.
Марина Дадашова.
Снимок Надежда Булышевалöн чукöртöмысь.