Июнь 25–öд лун кежлö районса видз-му овмöс котыръяс сигöртiсны гöра-кöдза уджъяс. Куим крестьянин овмöс кутысь пуктiсны картупель 2,75 гектар.

Видзму овмöс котыръяс скöтлы вердас турун улö ставнас гöрисны 463 гектар му, мый колана мында тувсовъя кöдзас улö. Агсалiсны урчитöм 865 гектар.

Таво урчитöма öти вося турун кöдзны 450, уна восясö 355 да кыкнаннас сорöн 47 гектар. Ставнас артыштöма кöдзны 805 гектар, мый 48 процент вылö унджык 2024–öд воын серти. Öти да уна вося турунсö кöдзисны урчитöм мында. «Помöсдiн» кооператив кöдзис öти да уна вося турунсö 60 гектар да кыкнансö сорасöн 47 гектар. Таво мусö лючки бурмöдiсны диска агас отсöгöн. «Пожöг» кооператив кöдзис уна вося турун 330 да öти восясö 300 гектар. Крестьянин овмöс кутысь С.А.Тимушев öти да уна вося турунсö кöдзис 30 гектарöн. Крестьянин овмöс кутысь Е.Е.Тарабукина кöдзис öти вося турун 40, уна восясö 15 гектар.

«Пожöг» да «Помöсдiн» кооперативъяс да крестьянин овмöс кутысь Н.С.Погодина петiсны нин заптыны кöрым. Ытшкисны 98 гектар, вöчисны 200 тонна сенаж.

Анастасия Ярова, видз-му овмöс юкöнöн веськöдлысь.