Таво Ичöт Аныблöн «Мишкин лес» шойччанiнын нёльöдысь чукöртчылiсны гитараöн ворсысьяс «Бипур» рытпук вылö. Гитараöн матö дас ворсысь пöвстысь вöлi и 18 арöса том ныв – Юлия Анатольевна Турьева. Том йöзлы сиöм лун кежлö мойвиис сёрнитыштны. Сiйö оз нин öтчыдысь петкöдчы сцена вывсянь. Сьывлiс и бардъяслöн чукöртчылiгöн, и рокфестиваль дырйи, и районын мукöд гажъяс нуöдiгöн. Юлиялöн быд сьыланкыв йитчöма кутшöмкö морткöд. Таво «Бипур» рытпук дырйи сiйö гитара улö сьылiс ставлы тöдса Мистер Кредолысь «Медляк» песня, кодi медся муса да радейтана мамыслöн. Колö шуны, мый Ичöт Аныбö Юлия локтiс бать-мамыскöд, кодъяс ичöтсянь отсалöны нылыслы быдмыны да сöвмыны. Натöг, Юлия серти, сылöн унатор эськö эз артмы.

Талун кежлö Юлия Турьева велöдчö республикаса искусствояс колледжлöн эстрада юкöнын. Колис эштöдны бöръя нёльöд курс. Велöдчöм бöрын сiйö босьтас öтпырйö куим профессия – артист, дирижёр да гитараöн велöдысь. Музыка дорö муслун Юлиялöн чужис батьыслöн туйдöдöм-велöдöм отсöгöн. Ичöтсянь сiйö кывзiс гитара улын юргысь сьыланкывъяс. «Яблоки на снегу» песнятöг эз вермы весиг унмовсьны. Юлия быдмыштiс да батьыс велöдiс сiйöс тöдны аккордъяс. Нывлы окота лоис тöдмавны да кужны унджыктор. Та вöсна ворсiс и сьылан котырын, пырöдчылiс быдсикас конкурсъясö, и, опыт вылö видзöдтöг, велöдiс мукöдöс. Музыкалысь грамота да теория велöдiс ачыс. И тайö отсалiс колледжын велöдчигöн. Талун кежлö Юлия Турьевалöн эмöсь йöз, кодъясöс сiйö велöдö и карын, и сиктын. Ставныс радпырысь ветлöны том нывлöн урокъяс вылö да сöвмöны музыкаын. Ачыс Юлия окотапырысь ветлöдлö театрö, кöнi шойччö ловнас.
Колледж эштöдöм бöрын Юлия Анатольевна кöсйö водзö велöдчыны А.К.Глазунов нима Петрозаводск карлöн консерваторияын.

Сыктывкарын сылöн эм куим ыджыд вок, кодъястöг эськö карын велöдчигöн вöлi сьöкыдджык. Прöст кадö Сыктывкарын аддзысьлö и аслас школаса Дон сиктысь нывъёрткöд, Елена Тимушевакöд. Öнi, гожся каникулъяс вылö чужан сиктö воöм бöрын, Юлия дзик пыр кывлiс лэбачьяслысь дзользьöм, вöр-валöн шыяс лöньöдiсны сьöлöмсö. Тöвнас Носимса ныв радейтö нимкодясьны кодзула енэжöн. Карын найöс аддзыны он вермы. Матысса йöз кындзи сиктын виччысьöны сiйöс и пон да кань.
Том йöзлы Юлия Турьева сиö эскыны ас вын да позянлунъяслы. Повтöг пöртны олöмö пуктöм могъяс, аддзыны асьнысö да лоны шудаöн быд здукö.
Наталья Тимушева.
Снимокыс Юлия Турьевалöн чукöртöмысь.