Кулöмдiнса шöр школаысь ас кöсйöм серти отсасьысь челядьлöн «Бур сьöлöм» отряд быд во ва вежöдан лунö нуöдлö «Вежа ва» паса удж.
Пырöдчисны сэтчö и таво. Школаса старшöй вожатöй Лариса Петровна Зезеговаöн юрнуöдöмöн 6 «б» класса ныв-зон вежа Николай Чудотворецлöн ключысь ыджыд дозмукъясö босьтiсны вежöдöм ва. Школаын кисьталiсны сiйöс посни дозъясö, мичмöдiсны найöс водзвыв дасьтöм открыткаясöн да разöдiсны-козьналiсны гортöдзныс нуöмöн велöдысь-ветеранъяслы. Отсасисны налы и 4 «в» да 3 «в» классъясса орлятаяс да 7 «в» класса челядь. Вежа ва, уна вайöмöн, вичмис и öнiя велöдысьяслы.

Галина Нестерова.
Снимок гижысьлöн.