Войся «гöсьт»

Тöлын кузь пемыд войясö сикт-посёлокъясын вывтiасьöны кöинъяс. Öнi уналöн ывла стенмас öшалöны видеокамераяс, да позьö видзöдны, мый вöчсьö керка йöрын лун кöть вой. Неважöн öтуввезйын петiс видео, кыдз кöин курччалö кык понйöс да öтисö голяöдiс кыскö камералы тыдавтöминö. Тайö вöлi асывнас вит да квайт час костын Кулöмдiнын Интернациональнöй улич вылын. Уличаыс кывтыдын нюжалöма Эжва ю пöлöнтi. Со мый сiйö висьталiс понъяслöн кöзяиныс.
— Белка да Стрелка том понъяс. Войнас узьлöны кильчö вылын домтöг да кöин вылö уськöдчисны асьныс. Гожöмнас ывла йöрын видзам ыжъясöс, да йöз пон кö матыстчö на дорö, сiдз жö уськöдчöны вöтлыны. Гашкö, и öнi кöинöс чайтiсны понйöн да, — висьталiс лоöмторсö Анатолий Александрович Тюрнин кöзяиныс.
Асывнас, садьмöм бöрын, кылiс нёль кока «ёртъясыслысь» лёкысь увтчöм. Кöмтöгыс и восьтiс кильчö öдзöс да видзöдлiс, мый керсьö ывлаын. Анатолий Тюрнин ичöтсянь кыйсьö-вöралö да дзик пыр и гöгöрвоис, мый понъяс пурсьöны кöинкöд. Кöмтöгыс и чепöсйис дорйысьны, зверöс повзьöдöм могысь весиг бедь эз сюр ки улас.
— Эг и гöгöрволы, мый кöмтöм. Лёкысь босьтчи горзыны. Кукань ыджда кöиныд кватитiс кычитö голяöдыс да чепöсйис аслас локтан кок туйöд бöр вöрлань. Мöд кычиыс «ёртсö» эз коль, лёкысь жö увтчöмöн бöрсяньыс, ме на бöрся. Кыскис вель ылöдз да лэдзис. Понлöн голяас öшалiс ошейник, да сiйö, гашкö, и видзис джагалöмысь. Гортлань бöр локтiс ас кокöн да зэв öдйö пырис посводзö.
Югдöм бöрын кöзяин ветлiс кöин кок туйöд. Зверыд мунöма ю дорöдзыс да чеччыштöма куим кымын метра бокö бадьяс пытшкö. Анатолий висьталö, найö пö тадзи воштöны водзö мунан кок туйсö.
— Ми олам вöр дорын, да кöинъясыд волывлöны тшöкыда. Верöсöй ичöтсяньыс видзлiс понъястö да ёна радейтö найöс. Пиным важöн нин пуктiс видеокамера, но мыйлакö эз уджав. Неважöн на дзоньталiм, да со тай кортöм «гöсьтъястö» и снимайтöма. Лун кык мысти видеокамера нöшта на петкöдлiс войын шöйтысьясöс. Но вöлi пемыд, сюръя вылын бияс эз öзйыны, да эг гöгöрвоöй, пон либö кöин, — содтiс Наталья Николаевна гöтырыс.
Районса администрацияысь гражданскöй оборона да видзчысьтöм лоöмторъяс да йöзöс доръян юкöнöн веськöдлысь С.А.Романовöн висьталöм серти, кольöм воын вöралысьяс лыйисны 10 кöинöс. Таво, йöзлöн юöртöм серти, матыстчылiсны нин Кулöмдiнö, Кужйö да Носимö. Вöралысьяслы позьö кыйсьыны март помöдз. Казьтылам, кöинöс лыйны позьö сöмын сикт сайын. Веськалiнныд кö, да кулiс, колö кульны кусö да вайны матысса лесничествоясö либö налöн юкöнъясö, а сiдзжö республикаысь «Охотнадзор и контроль» госучреждениеö.
— 4-5 во сайын кöинъяс ёна вывтiасисны. Та могысь шыöдчылiм вöралысьяс дорö. На отсöгöн артмис чинтыштны лыдсö. Ывлавывса озырлун, вöр-ва да сынöд видзан министерство да районса администрация пасйылiсны найöс сьöма отсöгöн да аттьöалана гижöдъясöн. Кора районса олысьясöс йöртны понъясöс ён чомйö либö керкаö. Эн шыблалöй сёян-юан колясъяс лöп-ёг контейнеръясö да бокас. Кöинъясöс сикт-грездъясö кыскö кокни кынöмпöт. Аддзылiнныд кö кöинöс сиктын, колö шыöдчыны пытшкöсса делöяс министерстволöн районса юкöнö, — пасйис районса администрацияöн веськöдлысьöс вежысь В.В. Бадьин.
Йитчылi и миян районса охотоведкöд.
— Кöинъясöс кыйны позьö сöмын торйöн босьтöм разрешениеöн. Лесничествоын лыйöм зверöс либö кучиксö пасъясны вундыштöмöн. Тайö вöчсьö, медым вöралысь мöдысь эз вай сiйö жö кыйöмторсö. Лесничествоын пасйысьöм бöрын да колана кабалаяс лöсьöдöм бöрын кыйсьысьлы öчередтöг сетам мöд во вылö йöра кыйны лицензия. Бур юöр: тавосянь кöин кыйысьяслы бара кутасны сетны сьöм.
Кöин — зэв видзчысьысь звер, морт вылö ачыс оз уськöдчы, — кывкöрталiс республикаысь «Охотнадзор да контроль» госучреждениеса миян районын охотовед А.О.Тимушев.
Татьяна Чувьюрова.
Наталья Тюрниналöн снимок вылын: повтöм Белка да Стрелка.
Комментарии: