Культураса уджалысьяслöн чукöртчылiгöн бур боксянь пасйисны унаöс. Эз кольны бокö и найöс, кодъяс оз нин уджавны тайö юкöнын, но югыд шондi моз век на мыччысьлöны да югзьöдöны йöзлысь олöмсö. Тадзи аттьöалана гижöдöн пасйисны и Дереваннöйысь Людмила Васильевна Осиповаöс, кодi матö 30 во сетiс культуралы. Ачыс ань чужис Помöсдiнын уна челядя семьяын. Батьыс да вокыс зэв мичаа гудöкасисны, мамыс ворслiс балалайкаöн. Гашкö, сiйöн и Людмилалöн сьöлöмас ичöтсяньыс йиджис культураыслöн руыс. Киномеханикö велöдчöм бöрын ассьыс уджсö вöчöмысь кындзи вежлавлiс и мукöдъясöс отпускалiг ли висигкостiныс. Сэсся том аньöс кöсйисны мöдöдны уджавны Ручö, но сiйö бöрйис Дереваннöй. И со 50 во нин олö сэнi. Петiс верöс сайö, чужтiс вит челядьöс. Нылыс, Любовь Николаевна Осипова, мунiс мамыслöн кок туйöд. Матö 20 во веськöдлö Дереваннöйса культура керкаöн.

1990–öд воясын Дереваннöйса культура керкаöн веськöдлiгöн Людмила Васильевна шыöдчис культура юкöнöн сэкся веськöдлысь Михаил Витальевич Карманов дорö, медым котыртны сиктын ыджыд гаж. Айлов эз öткажит да шуис артыштны ставсö стöча. Сэки кутiсны паськавны сиктъяслöн асланыс гажъяс – Носимын, Ручын, Дереваннöйын. Людмила Осипова культураын уджалiс 2005–öд воöдз, но пыр на петкöдчö уна сикас гажъясын. Сьылö öтнас. Уджалiгас веськöдлiс «Коми аньяс» хорöн, сэсся чукöртiс «Парма гор» котыр. Пыр тöждысис йöз вöсна. Сылöн чайтöм серти, культураса уджалысь – зэв кывкутысь морт. Колö кужны сибöдчыны йöз дорö, лöсьöдны гажъяс, медым сиктсаяс вермисны шойччыштны быд лунся тöждъясысь. Уджыс сылысь босьтö уна кад.
Наталья Тимушева.
Снимок Людмила Осиповалöн.