💫Мортыд кö сяма, то, дерт жö, унаторйын. Тадзи векджык казявлан олöмас. Тайö нöшта öтчыд петкöдчис Кебанъёльса öти анькöд тöдмасигöн. Эмма Ивановна Кочанова – мича нюмбана да кыввора, сибыд морт. Сы ордö волiгöн, гортас пырöмсянь нин син улö усисны сылöн мастеритöмторъясыс, веранда пытшсö гажöдысь дзоридзьяслы вöчöм пелькиник кашпояс. Ань кыпыда вочаалiгмоз корис пырны пыдi жыръяс, кöнi сылöн, видзöдöмысь, шойччанiн да уджаланiн. Пызан вылас выль кашполы панöмтор. Танi, тыдалö, и чужöны сылöн киясöн мича кудъясыс. Орчча диван вылас быттьö öшкамöшка югнитлiсны яръюгыд рöма шöртöн серлöдлöм ок и мича кепысьяс. Сiдзи и вöзйысьöны киад. Небыдöсь, шоныдöсь.

– Кык во сайын дугдi уджавнысö, петi шойччöг вылö, со и босьтчи кысьыны, – висьталiс Эмма Ивановна. – Сiдзсö ме кыся ёна ичöтсянь, вит арöссянь нин. Мам медводз велöдiс крука емöн кыны прöшви, кыöмторнас мичмöдлi крöвать дор. Вочасöн и пырöдчи кысян уджö. Да и олöмыс сэки тшöктiс, торйöн нин кольöм нэмся 90–öд воясын. Сэки ме вöлi верöс сайын нин, челядя, паськöмыд ёнасö эз сюр, со и ковмис колготки-гачтö кыны, кепысь-носкиястö да. Сёрöнджык босьтi кысян машина, сэсся электроннöйöс на, на отсöгöн кылi носкияс, гетрыяс, жилетъяс, ковтаяс да мукöдтор. А кепысьястö кыи кипомысь…
Водзö лыддьöй апрель 4-öд лунся газетысь.
Галина Нестерова.
Снимок гижысьлöн.