Отсасьны быдöнлы

[ A+ ] /[ A- ]

 Мича ов новлысь Екатерина Егоровна Дубровская 40 во нин бурдöдö Смолянкаса олысьясöс. Со весиг öнi, кöть и пенсия вылын, вежö отпуск аслас уджъёртлысь.

Ань шняч коми морт. Нывдырся овыс Чисталёва. Чужис да быдмис Вылыс Ярашъюын. Бать-мам вöлiсны зэв шань да уджач йöзöн, корисны челядьсö бура велöдчыны. Катя дзолядырсянь нин ворсiгöн радейтiс вöчавны аканьяслы уколъяс. Кöкъямыс во велöдчис Вылыс Ярашъюын, кык во Пожöгын, а сэсся мунiс Сыктывкарса медучилищеö. Нёль чоя-вока пиысь сiйö öтнас бöрйис бурдöдысьлысь туйвизь. Куимысь унджык во велöдчöм бöрын сiйö нывъёртъясыскöд мöдöдчис уджавны Кулöмдiн районö. Сэки Вылыс Эжваын шöр врачöн вöлi Феликс Николаевич Гуляев. Вöзйис том специалистъяслы бöрйыны Немдiн, Керчомъя да Смолянка. Öтиыс дзик пыр бöрйис Немдiн, ачыс вужнас сэтысь да. Екатерина Егоровна босьтiс Смолянка, сы вöсна мый ачыс тшöтш быдмис посёлокын, а коймöд нывъёртыс мунiс Керчомъяö. Куимнанныс петiсны верöс сайö да öнiöдз на олöны сiйö жö сикт-посёлокъясас, паныдасьлöны, казьтывлöны томдырся кад да донъялöны öнiя олöм.

 Екатерина Егоровна помалiс училище кыдзи акушер, но пыр кыпöдiс тöдöмлун да сям. Позьö шуны врачсьыс на врач. 40 во сайын Смолянкаын олiс-уджалiс уна морт. Висьысьяслы весиг позис бурдöдчыны куйлöмöн. Но олысьыс чинiс, да колис öти фельдшер. Ань уна во на уджалiс пенсия вылö петöм бöрын. Кольöм во помын шуис шойччыны. Но и талун сiйöс корисны уджавны, вежны отпуск. Корлiсны уджавны и Немдiнö, и Югыдъягö. Сы мында вонас Екатерина Егоровна отсалiс зэв уна йöзлы. Быдторйыс öд овлö олöмад. Кодлыкö колö тэрыб отсöг, кодлыкö колана лекарство, а кодлыкö и мелi кыв. Ыджыд сяма бурдöдысь серти сиктса фельдшерлы колö пыдди пуктыны йöзöс, лун да вой лоны дасьöн, кывкутысьöн да радейтысь мортöн. Зэв окота, мед ылi сикт-посёлокъясö локтасны уджавны том йöз.

 Екатерина Егоровна танi и аддзис ассьыс шудсö, тöдмасис сöмын на армияысь воысь Валерий Владимировичкöд. Муслун гöрддзасьöм бöрын петiс верöс сайö. Чужис кык челядь — пи да ныв. Быдмö Глеб внук, быд гожöм волö на дорö. Валерий Владимировичлöн уджыс да олöмыс йитчöма вöркöд. Бура тöдö коми парматö. Ветлö вöравны. Гöтырыс сыысь оз кольччы, вотö тусь да тшак. Новлöдлöны вöрö и внукöс. Дубровскийяс олöны öта-мöдсö радейтöмöн, эскöмöн, отсасьöмöн. Муса верöс кö висьмас, Екатерина Егоровна бурдöдö ­ гортас. Мыйла пö ме кута ветлыны больничаö, кор менам гöтыр врач. Екатерина Егоровналöн выныс да ыджыд сьöлöмыс тырмö и посёлокын олысьялы, и семьялы.
 Наталья Тимушева.
Снимок Артур Гарновлöн.

Комментарии:

Добавить комментарий

Свежий выпуск: 20 июня

Осторожно — мошенники!