Енсянь Велöдысьяс

[ A+ ] /[ A- ]

 Регыд кыпыда мунасны школа помалысьяслöн бöръя рытъяс. Ме сизим во сайын нин эштöдi Пожöгса шöр школа, а пыр на син водзын тайö гажа кадыс. Шань да уджач, енбиа да бур сьöлöма велöдысьяс нуöдiсны миянöс тöдöмлунъяс туйöд, бур кывъясöн ышöдiсны водзö велöдчыны да лоны бур йöзöн.

 «Класснöй» мамöн миян вöлi ыджыд шыпассянь Велöдысь — Нина Александровна Шомысова, кодi сетiс географияысь тöдöмлунъяс. Мелi гöлöса, медся шань да гöгöрвоысь, бура велöдысь, раминик да ыджыд терпениеа, миянöс радейтысь да став вöсна висьысь! Сы мында бурсö сiйö миянлы сетiс, мыйта енэжын лыдтöм кодзулыс! Öнi гöгöрвоам, кутшöм сьöкыд вöлi миянкöд, öд ставным аслыспöлöсöсь да асныраöсь, а коркö и кывзысьтöмöсь вöлiм.

 2017-öд вося миян выпусклы усис ыджыд шуд — «класснöй» мам кындзи вöлi и «класснöй» бать — Владимир Игоревич Шомысов, кодi велöдiс ОБЖ да нуöдiс «Начальнöй военнöй подготовка». Некор оз вун Нина Александровна да Владимир Игоревичлöн интереснöй урокъяс, кодъяс вöлi öдйö лэбöны вом паськöдöм кывзiгад! Тайö бур да прамöй гозъяыс кутшöм сöмын Айму дорö муслуна да сьöлöм вöрзьöдана мероприятие эз дасьтыны Пожöгын! Арын — «Зарница», тöлын — «Йиркап», тулысын — концерт «Виктория», «Кувлытöм полк», миян медся гажа да синва тюргысь «Бöръя звöнок», а гожöмын — «Выпускнöй»…

 Таво лöддза-номъя тöлысьö дас нельöд лунö Владимир Игоревич чужöмсянь тырö 70 во. Сiйö пыр олö миян, сылöн велöдчысьяслöн, сьöлöмын… Енсянь Велöдысь, енбиа, зэв киподтуя да бур сьöлöма коми морт, Коми му да вöр-ва радейтысь, коми кыв пыдди пуктысь, став вöсна тöждысьысь, бур вылö туйдысь — татшöмöн казьтывлам дона Велöдысьöс.

 Владимир Игоревич торъялiс мукöдысь салдат кодь тэрыб воськолöн, падъявтöм гöлöсöн, водзö вылö уна могъясöн, ыджыд вежöрöн, öзйысь синъясöн да зарни киясöн! Ме век вöлi чуймала, кытысь сiйö босьтö сы мыйта вын-эбöс да кор сiйö ставсö удитö вöчны — сетiс урокъяс радейтана школаас, котыртлiс уна сикас гаж, велöдiс маршируйтны да кокниа бергавны вальсын, йöзöдiс ассьыс гижöдъяс сöстöм коми кыв вылын, бура фотографируйтiс сиктса йöзöс да гöгöрбокса вöр-валысь помтöм мичсö, ёна кыйсис да чукöртiс тшак-вотöс. А мыйта сылöн вöлi мичасьыс мича ас киöн вöчöмторйыс! Со кутшöм быдтор кужысь морт! Унатор эг на и гиж…

 Владимир Игоревич кужис сетны олöмын уна колана сöвет да став сьöлöмсяньыс радлыны миян вермöмъяслы. Радейтана да шань сьöлöма велöдысьяс унаысь миянöс примитлiсны мойдын кодь мича ас вöчöм керкаас. Ыджыд пызан сайын эз куслыны гажа сёрнияс, эз саявлыны мича нюмъяс. Кутшöм наясын кыпыд да лöсьыд! Волан, да быттьö эбöсыд содö, бордъяс мушку сайын быдмöны — сэтшöма найö эскöны тэнад вермöмъясö! Шудасьыс шуда здукъяс…

 Муöдз копыр да ыджыд аттьö, дона Велöдысь! Мед жö Владимир Игоревичлöн зарни кияссьыс петанторъясыс да став бур вöчöмыс олас Пожöгса шöр школаын да сылöн велöдчысьяслöн сьöлöмъясас! Бура казьтывлам да помся радейтам.
Елена Рокина.
Снимок гижысьлöн чукöртöмысь.

Комментарии:

Добавить комментарий

Свежий выпуск: 20 июня

Осторожно — мошенники!