Коркö, важöнкодь нин Кулöмдiнса ань Зина Петровна Львович висьтавлiс, мый Кулöмдiнын уджавлöма драматическöй театр, пуктывлöмаöсь бур спектакльяс. Зина Петровна ачыс вöлöма ворсысьяс лыдас.

Театрын уджавлöмаöсь унаöн районысь, тшöтш и Кулöмдiнысь. На лыдын Луиза Ивановна Чисталева, кодöс ме тöдлi на. Юрсиктын театрыд сэсся эз нин ловзьыв, а Луиза Ивановна петкöдчывлiс художественнöй самодеятельностьлöн концертъяс вылын. Казьтыштi да, пельын кылi сылысь радейтана «Почему я водовоз» сьылöмсö. Гöлöсыс ён, мича. Бöрыннас дыр уджалiс пошта юкöнын.

Коми Республикаса национальнöй библиотекаысь сюри Д.Т.Козловаöн лöсьöдöм-лэдзöм «История театральной культуры Республики Коми. ХХ век» небöгысь Кулöмдiнса театр йылысь неыджыд гижöд. Дженьыдика кö, Ижмаса театр тупкигöн ворсысьяслысь котырсö юкöмаöсь кык пельö: öтисö ыстöмаöсь Абьячойö, мöдсö — Кулöмдiнö. Öтилаас и мöдлаас котыртчöма сiдз шусяна колхозно-совхознöй театр. (Ог тöд, мыйла тадз шулöмаöсь. — Н.Б.). Кулöмдiнса ворсысьяслöн коллективöн веськöдлöма Коми АССР-са заслуженнöй артист М.А.Расторгуев. Спектальяс петкöдлыны ковмöма куим – Кулöмдiн, Сторожевск да Кöрткерöс районъясын.

Кулöмдiнса театрö уджавны содтöд локтöмаöсь республикаса драматическöй театрысь артистъяс А.А.Глебов, Н.В.Выборова, С.А.Пылаев, актриса да режиссёр Т.П.Карендова, тшöтш художественнöй самодеятельностьясын ворсысьяс Э.В.Колмакова, А.А.Обрезкова, Е.С.Тарабукина, И.Д Катаев да мукöд. 1947 воын музыкант-баянистöн вöлöма бöрынджык нималана композитор Я.С.Перепелица. 1947 восянь театр тупкытöдз уджавлöмаöсь репрессируйтöмаяс, актриса Х.Фришер да художник китаец Цю Дзинь Шань, кодъясöс Кулöмдiнö уджавны ыстывлöмаöсь Княжпогостса лагернöй театрсянь.

Республикаса национальнöй архивысь пасйöдъяс серти, 1943 вося июнь 18 лунся приказöн театрöн веськöдлысьöн индöмаöсь Ю.Оботуроваöс (Трошева), 1946 воын театрын директоралöма В.Д.Леканов, кодöс татчö ыстöмаöсь уджавны ГИТИС сöмын на помалöм бöрын, постановкаяс пуктысьöн вöлöма Н.М.Дьяконов, кодi бöрынджык нималiс «Свадьба с приданным» сылöн удж серти снимайтöм киноöн. 1946 воын администраторöн вöлöма Африкан Иванович Напалков (менам чайтöм серти — районса морт. — Н.Б.), а ворсысьяслы кöм-пась лöсьöдöм кузя кывкутöма Тамара Степановна Митюшева.

Театрлöн котырын уджавлöмаяс лыдын районын тшöкыда паныдасьлысь оваясыс вель уна: М.Н.Ногиев, А.И.Липин (баянист), Р.Н.Савельев, С.В.Мамонтов, Е.С.Тарабукина, Г.Н.Попова, П.А.Нестеров, Н.В.Тарабукин да с.в. Гашкö, рöдсьыс кодъяскö и кывлiсны та йылысь либö колисны казьтывлана снимокъяс.

Д.Т.Козлова вылынджык казьтыштöм небöгын гижöма, мый Кулöмдiнса театрын 1948 воын вöлöма 28 уджалысь. Дасьтöмаöсь да петкöдлöмаöсь 117 спектакль да концерт. Асланыс уджъясöн артистъяс некымынысь кытшовтöмаöсь районнымöс, ветлывлöмаöсь Сторожевск да Кöрткерöс вожса сиктъясö. Пуктывлöмаöсь тшöтш А.Островскийлысь «Без вины виноваты», В.Масслысь да М.Червинскийлысь «О друзьях-товарищах», М.Алигерлысь «Сказки о правде», Г.Федоровлысь «Пути-дороги» да мукöд гырысь постановкаяс.
Сьöмöн омöля могмöдöм вöсна 1949 воын Кулöмдiнса театр тупкысьöма.
Нина Буткина.
Кулöмдiнса шöр школалöн чукöртöмысь снимок вылын Кулöмдiнса театрын ворсысьяс. 1946 во.