Кулöмдiн районын 35 культура керка да клуб. Став тайö ыджыд овмöснас 2013-öд восянь веськöдлö Александра Ивановна Касева.
Ань ыджыд пай пуктö материально-техническöй подув выльмöдöм-бурмöдöмö, сылöн юрнуöдiгöн ёна вежсисны культура керкаяс да клубъяс. Дзоньталöны важмöм стрöйбаяс, воссисны выльяс Донын, Немдiнын да Вöльдiнын. Выльмö и оборудование, мый сетö позянлун уджавны бурджыка, öнiя кадся ногöн да вöчны кыпыд гажъяс. Немдiнын культура керка лэптiгöн Александра Ивановна пыр кутiс аслас видзöдлас улын уджъяс мунöмсö.
2015-öд воын сылöн водзмöстчöмöн лöсьöдiсны вурсянiн, кöнi сцена вылын йöктысь-сьылысьяслы вурöны мича дöрöм-платтьö. Творческöй котыръяс петкöдчöны оз сöмын республика тшупöдын, но и пырöдчöны Россияса фестивальясö. Талун вит котырлöн эм «Народнöй» ним. А.И.Касева ышöдö уджалысьяссö видлыны сям гранта конкурсъясын, тшöкыда вермöны. Та могысь и ачыс быд во кыпöдö кужанлунсö семинаръяс да курсъяс вылö ветлöмöн.
Александра Ивановна водзмöстчö и районса олöмын. Кольöм воын сiйöс бöрйисны Зимстан овмöдчöминса сöветö депутатöн да сöветса председательöс вежысьöн. Аньлöн содiс Дзоль, Фроловск, Климовск, Лöгинъяг да Зимстанса йöз да налöн олöм вöсна тöжд-могыс. Тшöтш и сылöн нырччöмöн таво Дзолльын бурмöдасны сотöвöй йитöд — во помöдз сувтöдасны вышка.
Матö öкмыс во культура юкöнын уджалiгöн Александра Ивановна петкöдчис сувтöдöм могъяс олöмö пöртны кужысь, зiль да киподтуя мортöн. Йöзöс пыдди пуктысь-тöждысьысь да уджсö пыдiсянь тöдысь веськöдлысьöн.
Татьяна Чувьюрова.
Снимок Ольга Васильевалöн.