И уджын, и олöмын

[ A+ ] /[ A- ]

 Ичöтик сикт, а культура керкаын олöмыс пуö. Урчитöм кадö локтöны челядь, удж бöрын тэрмасьöны томъяс да верстьö, водзмöстчöны и олöмаяс. А ставнысö ышöдö-кыпöдö Анна Витальевна Кочанова, кодi 17 во нин зiльö чужан сиктын. Ань велöдчис Сыктывкарса культура колледжын, босьтiс режиссёрлысь специальносьт.

 — Локтöны окотапырысь и челядь, и верстьö, — пасйис Носимса культура керкаöн веськöдлысь Анна Витальевна. — Зонкаяслöн «Озорники», ичöт нывкаяслöн «Карусель», гырысьджыкъяслöн «Родники» да шойччан лунö волöны серпасасьны радейтысьяс. Оз кольччыны и «Йöлöга» олöмаяслöн котырö пырысьяс. Сьылöны да йöктöны, дасьтысьöны конкурсъяс кежлö. Сиктсаяс ловнысö кыпöдöны, радейтöны ворсны бильярд да пызанвывса теннисысь. Рытнас нин чукöртчö «Медбур кад» котыр. Тайö аньяс, кодъяскöд тшöтш жö сьылам да йöктам. Асьным ньöбам дöра да вурöдам выль костюмъяс. Гажъяс нуöдам öтув библиотекакöд. Олысьяс ёна радейтöны видзöдны спектакльяс, сценкаяс, да ворсöмъясöн петкöдчöм могысь «Медбур кад» котыркöд лöсьöдiм «Мойд» театрса кружок. Быд гаж пансьö аслыспöлöса. Воддза воясас пуктылiм «Снежная королева», сэсся «Ночь перед Рождеством» ворсöмъяс. Выль во кежлö пуктiм «Ирония избы или с нелёгким паром» шмонитана теш. Йöзлы воö сьöлöм выланыс, да тайö ышöдö миянöс уджавны бурджыка и бурджыка, пыртны уджö выльтор.

Анна Витальевна «Медбур кад» котыркöд пырöдчисны «Российский союз сельской молодёжи» öтмунöмö. Веськöдлысьнас бöрйисны Светлана Игнатоваöс, Носимса, но олö Ухтаын. Быд босьтчöмын миян аньяскöд. Сиктсаяскöд чукöртöны торъя военнöй операцияö пырöдчысьяслы медся коланасö, водзмöстчöны быдсикас акцияясын, казьтылан пас гöгöр весалöны лым, ва вежöдан лунö разöдiсны вежа ва да с.в.

— Кöсъя пасйыштны, мый «Медбур кад» котырын зэв нырччысь аньяс. Кокниа кыпалöны быд бурас. Колiгъясöн машинаöн отсалö-могмöдö Татьяна Напалкова, кöть и олö Кулöмдiнын. Надежда Гилева культура керкаын оз сöмын пелькöдчы, но серпасасьö, кытiкö да вурыштö либö лöсьöдыштö, отсасьö быд уджын. Öтлаын да бур сьöлöмöн ставсö бергöдам. Таво «Йöзкостса бюджет» бала серти шонталасны культура керкалысь стенъяс, тайö ставнымлы дыр виччысянатор. Зэв ыджыд аттьö шуа культура керкаö волысьяслы, сьылысьяслы да йöктысьяслы. Но менам эм кöсйöм, мед, эськö, локтас специалист, кодi велöдас сьывны колананог, ёсьтыны да пуктыны гöлöсъяс, — пасйис Анна Витальевна.

 Алёна Ермакова.
 Снимок Анна Кочановалöн.

Комментарии:

Добавить комментарий

Свежий выпуск: 7 февраля

Осторожно — мошенники!