Лузаберд районса Ношульын чужöм-быдмöм тайö том мортыс, Виталий Валентинович Вокуев, артмис сiдз, мый локтiс да вужъясис миян районö, Кулöмдiнö. Чужан сиктас помалiс школа, но эз тöд, кытчö водзö мунны велöдчыны. Бать-мамыс вöзйисны мунны Сыктывкарса öтиöд номера профтехучилищеö велöдчыны вузасьысьö. Зонка кывзысис найöс, но велöдчанiнас сöмын тай босьтiсны пусьысь-кондитерö.

 — Некор эг кужлы мöвпыштлыны, мый лоа пусьысьöн, öд сiйö кадö весиг макарон пуны эг куж. Велöдчи, уджыс вочасöн воис сьöлöм вылö. Да лоис на сiйö менам, рочöн кö, призваниеöн, — сьöлöмсяньыс кыпыда висьталiс Виталий Валентинович.

 Велöдчигмозыс вевъялiс на босьтны вузасьысьлысь да ЭВМ-лöн операторлысь специальносьтъяс. Училищеас уджыштiс мастерöн, а сэсся ас районас Абъячойса сельполöн нуръясянiнын пусьысьöн. Вочасöн сылöн чужис мöвп петны ас нянь вылö, восьтны кöть ичöтик нуръясянiн. Но тайö артмис ёна сёрöнджык. И миян районö локтöм бöрын нин. Кулöмдiнö воöм бöрын медводз уджалiс сельполöн вердчанiнын пусьысьöн, сэсся веськöдлысьöн, сельполöн правлениеса председательöс вежысьöн, нянь пöжаланiнöн веськöдлысьöн. Сылöн тупкысьöм бöрын и шуис збыльмöдны гуся мöвпсö — восьтны ассьыс удж. Сэки Виталий Валентинович олiс семьяöн нин. Надежда Александровна гöтырыскöд, кодi пасйысис асшöр уджалысьöн, и босьтчисны öтув. Ачыс йöзöс социальнöя могмöдан шöринкöд вöчис соцконтракт, мыйысь вичмöдiсны 250 сюрс шайт. Сьöмöн пуктысисны и асьныс. Нуръясянiн улö ньöбисны рынок вылысь вöвлöм вузасянiнлысь жыр, кодöс вужвыйöн дзоньталiсны куим во. Государстволöн отсöга сьöм вылö босьтiсны колана оборудование. И 2022-öд вося августын восьтiсны «Сладкоежка» кафе. Кöть ичöтик, но кыпыд. Танi чöсмöдлöны быдторнас: пиццаöн, пирöгъясöн, быдсикас юмовторъясöн. Водзвыв корöмöн дасьтöны чöскыд, серпасъясöн мичмöдöм тортъяс. Пыр йöза.

 — Нуръясянiнын дзескыд, да шуим паськöдчыны, — пасйис Виталий Валентинович. — Брускысь кыпöдiм керка дорас содтöд. Сэнi лоас квайт пызанлы артыштöм зал, кöнi локтысь йöзлы позяс тöрöдчыны унджыклы нин, а то öнi миян вöлi сöмын кык пызан. Позяс волыны семьяясöн, пасйыны чужан лунъяс либö сiдз пукыштны ёртъясыскöд. Öнiöдз пыр уджалiм гöтыркöд кыкöн, сiйö пусьысь жö, паськöдчöм бöрын, вермас лоны, ковмас босьтны содтöд уджалысьясöс, медым вевъявны тырвыйö бергöдны уджсö. Ставыс кö артмас, таво восьтам нин выль жырсö.

 Эскам, мый Виталий Валентиновичлöн да Надежда Александровналöн лючки збыльмас став мöвпыштöмторйыс, да водзö кутасны нимкодьöдны йöзсö асланыс чöскыд дасьтöмторъясöн.
Галина Нестерова.
Снимок гижысьлöн.