Электромонтёр, сэсся диспетчер

Владимир Витальевич Пашнин 27 во нин уджалö лунвыв электрическöй сетьяслöн районса юкöнын.

Чужис Скöрöдумын. Кöкъямыс во велöдчис сэтчöс школаын, и кык во босьтiс тöдöмлунъяс Помöсдiнын. Шуис мунны Сыктывдiн районса Выльгортö велöдчыны электромонтёрö. Армия бöрын уджалiс монтёрöн Помöсдiнса совхозын да шопералiс сиктсöветын. Тöдмасис Наташакöд, кодкöд 1994–öд воын и öти гöрöдö йитiс олöмсö. Наталья Иёльевна велöдысь, Кужйысь. Гозъя быдтiсны нылöс. Талун налöн эм внук-внучка.

1997–öд воын Пашнинъяс вуджисны Кулöмдiнö. Владимир Витальевич уджалiс электрикöн совхозын. 1998–öд вося ноябрын локтiс лунвыв электрическöй сетьяслöн районса юкöнö. 20 во зiлис электромонтёрöн. 2018–öд воын сылы вöзйисны лоны диспетчерöн, кодöн уджалö öнiöдз. Монтёрöн уджалiгöн колiс лöсьöдны-бырöдны жугалöминъяс, орöминъяс, керкаясö нюжöдны би, видзöдны би визьяс, дзоньтасьны. Диспетчерлöн лун и вой видзöдлас улын став подстанция, би визь, а сiдзжö лоöмторъяс бырöдысь, керкаясö би вайöдысь, би визь нюжöдысь котыръяслöн да мукöд удж. Диспетчер кусöдö би, кор котыр вöчасьö кутшöмкö юкöнын, да кутö накöд йитöд телефон либö рация пыр. Телефон пыр босьтö лоöмторъяс йылысь юöръяс. Пыр йитöда лунывыв сетьясысь диспетчеръяслöн юкöнкöд. Владимир Пашнин казьтыштiс лоöмтор йылысь.

– Öтчыд Пожöг-Кулöмдiн участок кытшовтiгöн пыри Кулöм юсянь, медым локны талань. Аддзи ошлысь сöмын на мунöм кок туй. Джуджыд турун кузя мунiгöн менам вöлi сöмын чер. Ошкыдкöд чернад он водзсась. Ковмис котшкыны пуö вачкалöмöн, горзыны, да весиг сьывны. Вöлi дзик öтнам, корси би визьын жугалöм, вöлöмкö, телевышка дорын провод вылö пöрöма пу.

Владимир Витальевич энергетиклöн лун водзын чолöмалö уджъёртъяссö, сиö, мед эз вöвны аварияяс, мед видзисны асьнысö, эз торкавны правилöяс. Йöзлы сиö терпенньö. Кусiс кö би, колö виччысьны. Мукöддырйи колö уна кад, медым ыджыд районысь аддзыны би кусöмлысь помкасö. Ыджыд сяма уджалысьяс ас кадö локтасны отсöгöн, бара на югзяс керка.
Наталья Тимушева.
Снимок Иван Самаринлöн.