Бур юöр: Помöсдiнысь школа музейын уджалысь, гижысь, шылад тэчысь, Россияса гижысьяслöн да журналистъяслöн котыръясö пырысь Александр Васильевич Шебыревлы сетiсны Россияса гижысьяслöн котырсянь Пушкин нима зарни медаль. Меным тай тшöтш нимкодь лои, мортсö тöда да. Ме моз жö Пожöг вожысь, öти пöрйö öтлаын уджавлiм районнöй газет лэдзанiнын. Сэки газетным шусис «Ленин туйöдöн» на, кор Александр Васильевич локтiс редакцияö. Корреспондентсянь воис редакторöс вежысьöдз, сы дырйи кыптiс газетлы выль ним вежöм йылысь сёрни.

Александр Васильевич коми кывсö тöдiс бура да та вöсна и гижан сямыс вöлi. Любöй тема вермис восьтыны-гижны, регыдöн лоис тöдса лыддьысьысьлы. И йöзыскöд сёрниыс артмис. Сэки гижысьяс тшöкыда ветлiм командировкаясö, аддзысьлiм клубъясын, уджалан местаясын сиктсаяскöд. Ошкывлiсны сылысь гижöдъяссö.

Вöлöмкö, кывбурасьö нин. Ёртъясöс тöдчана пасöн чолöмалöм гижыштны пырджык корлiм Вячеслав Бабинöс либö Эдуард Тимушевöс. Коркö Василий Лодыгинлы чужан лун кузяыс зэв мича кывъяс гижöма Александр Шебырев. Тадз миян котырын воссис выль кывбурасьысь, кöть, вöлöм, важысянь нин гусьöн гижö. Сэсся кывбуръяссö йöзöдлiс районса да республикаса газетъясын, босьтлiсны «Войвыв кодзув», «Арт» журналъясö, гижысьяслöн öтувъя небöгъясö. 2001–öд воын петiс Александр Шебыревлöн «Олöм туйтi» ас небöг. Некымынысь вöлi «Эзысь борд» республикаса конкурсын вермысьöн. А гижöм пьесаяс серти Помöсдiн культура керкаын ворсысьяс пуктöны спектакльяс.

Неважöн Сыктывкарса национальнöй библиотекаын вöлi Александр Васильевич Шебыревкöд аддзысьлöм. Волiс сэтчö эз сöмын кывбур чукöръясöн, тшöтш гитараöн да сьылiс. Сiйö тшöтш композитор. Олö ас киöн кыпöдöм керкаын. Шуда муса гöтырыскöд да челядьыскöд, нимкодясьö-быдтö ыджыд батьöн шуысьяссö.
Нина Буткина.
Республикаса национальнöй библиотекалöн снимок вылын А.В.Шебырев (шуйгавылас).