Таво ичöтик Кекур грездын коймöдысь зэв кыпыда мунiс «Играй, гармонь!» гаж. Чукöрмисны öти сцена вылö Малеысь Нина Мартюшева, Бадьёльйылысь – Алёна Карманова, Ручысь – Иван Попов, Дереваннöйысь – Александр Уляшев, Паспомысь – Анатолий Кочанов гудöкасьысьяс. А нöшта и гитараöн ворсысьяс – Носимысь Анатолий Турьев да Ручысь Анатолий Юдин. Мича, ён гöлöсöн роч сьыланкывъяс сьылiс Анатолий Кочанов. Ассьыс гижöмторъяссö ворсiс да сьылiс Александр Уляшев.

Ставнысö чöв-лöньöн сулыштны корис Анатолий Турьев, сьыланкывсö сиис торъя военнöй операция дырйи пöгибнитöм ёртыслы. Öтув пö сьывлiм, водзö олöм йылысь планъяс лöсьöдлiм, да сöмын тай том морт олöмсö сетiс Айму дорйигöн. Унаöн чышкалiсны синва…

Видзöдысьяс водзö «Кума» сьыланкывйöн петiсны Агния Степановакöд Иван Попов. Нина Мартюшеваöс кекурсаяс бура тöдöны да пыдди пуктöны, оз бöрыньт, век волö корöм гажъяс вылö и öнi ок мичаа сьылiс Рöдина йылысь, радейтчöм йылысь. Алёна Кармановалы отсалiсны олöмаяслöн котырöн веськöдлысь Нина Афанасьевна Уляшева да Любовь Игоревна Уляшева.

🎤Семьялöн во помасьö, а Ручысь Алёна да Анатолий Юдинъяслöн ставыс водзын. Öнi гозъя öтув петкöдчöны Ручса культура керкабердса «Сударушка» котырын. Радейтöны пуктыны сценкаяс, Алёна Михайловна мичаа лыддьö кывбуръяс.

Мöд семейнöй дуэт петавлiс сьöлöм вöрзьöдана сьыланкывъясöн, тайö Носимысь «Сёстры». Шылад инструментъяс вылын ворсысьястöг кык гöлöсöн мича сьылiсны кык чой Наталья Николаевна Зезегова да Зоя Николаевна Пафикова. Сцена вылö аслас кывбурöн петавлiс Александра Михайловна Шахова, Кекурса поэтесса. Лыддис торъя военнöй операцияö пырöдчысь зонъяс йылысь. Дерт, эз кольччы сьылöмысь, Роза Вилениновнакöд мича налöн артмö и частушкаяс, и кывбуръяс. Ёна отсасис Агния Валериановна.
Ыджыд аттьö гаж котыртысьяслы, видзöдысьяслы. Аддзысьлытöдз!
Екатерина Ульнырова.
Снимокъяс гижысьлöн.