Алексей Фёдорович Паршуков кык воысь унджык уджалö электромонтёрöн лунвыв электрическöй сетьяслöн районса юкöнын. Тайö специальносьтас велöдчис Печораын. Ачыс Мысысь, но куим во олö Донын. Уджалiгöн зон ветлiс велöдчыны быдсикас курсъяс вылö. Сыктывкарын босьтiс тöдöмлунъяс кустъяс вундалысь операторö да джуджыд сюръяяс вылын уджалысьö. Унаторйö велöдiсны-туйдiсны и ыджыд сяма уджъёртъясыс.

Электромонтёръяслöн уджын медшöрыс – би визь да подстанцияяс могмöдöм. Вужвыйöн дзоньталöны, кöнкö выльмöдöны визьяс и би визь улысь пилитöны кустъяс да пуяс. Кöнкö кö кусас биыд, пыр и петöны туйö. Кыдз шуласны, тэрыба дзоньтасян бригада. Овлö и сiдз, мый войнас лэптывлöны, тшöтш и шойччан да праздник лунъясö. Би вермас кусны поводдя вежласьöмысь – лыяс чардби, легзьöдас проводъяссö ыджыд тöвныр, провод вылö öшъяс уна лым. Би торксьöмöн Алексейлöн бригада медводз корсьö помкасö. Диспетчер пыр да мастер отсöгöн дасьтöны места, медым бырöдны артмöм мытшöдсö.

Гожöмын ветлöны командировкаясö. Алексей вежон уджалiс Помöсдiн да Тымсер вожъясын. Позьö шуны, кытшовтiс районсö ставнас. Эз вöв сöмын Зимстан вожын. Гожöмын югыд да шоныдджык. Та вöсна ыджыд дзоньтасян уджъяс бурджык вöчны гожся кадö. Алексей Фёдорович серти налöн уджын колö пыр велöдчыны, тöдны унатор. Быд во колö сдайтны экзаменъяс, видлöдчыны бурдöдысьяс дорын. Электромонтёръяслöн уджыс зэв колана да тöдчана. И талун ми аттьöалам тайö кывкутысь йöзсö, мый миян керкаясын пыр югыд да шоныд.
Наталья Тимушева.
Снимок Иван Самаринлöн.