— Кор гуляйтан, ветлöдлан посёлок гöгöр, то быдлаысь аддзан лöп-ёг. Локтысь гöсьтъясöс весиг абу окота нуöдны вöрö, гöгöр тырöма. Мыйыс сöмын оз туплясь: и важ кöмъяс, и банкаяс, и кöрт шыбласъяс. Гöтыркöд мöвпыштiм, мый колö весавны Тимшер дорса вöр. Комиын век пöрöдлiсны вöр. Сöвет кадö бурджыка вöлi тöждысьöны ас му вöсна. Кольöм нэмлöн 30-öд воясын пöрöдчöм бöрын и мыръяссö бертлiсны, и весиг куртiсны кöрт куранöн став увъяссö, — висьталiс Александр Алексеевич Паршуков.

 Душ-мöд во нин Паршуков гозъя нуöдöны лöп-ёг идралан удж. Кыкысь вонас, тулысын лым сылöмöн да гожöмын прöст кадö. Со и неважöн на спорт школаö ветлысь челядькöд öтвылысь весалiсны вöвлöм аэропортлысь инсö. Сувтöдiсны «Берегите природу. Не оставляйте мусор в лесу!» гижöда кык баннер. Уджалöм бöрын челядьöс чöсмöдлiсны арбузöн. Бура зільöмысь аттьöалöмысь налы вöлi зэв нимкодь.

 Ставыс заводитчö семьясянь. Мужичöй ассьыс челядьсö велöдiс овны сöстöма кыдзи и ас керкаын, сiдз и посёлокын да вöрын.

 — Ме, кыдзи посёлокö овны вуджысь карса олысь, казялi, мый посёлокын этша ёг доз. Öти сулалö клуб, мöд — больнича дорын, коймöд — школа бокын. Вöлi кö тырмымöн, унаöн эз эськö шыблавны туй бокö да кытчö веськалö сiйö жö кампет корсö. Мортöс ичöтсянь колö велöдны овны сöстöма, тöждысьны ас му вöсна. Кор челядь пырöдчöны посёлок пелькöдан öтувъя уджас, сэки велöдчöны пыдди пуктыны да видзны чужанін, радейтны вöр-ва. Дугдöны ёгöсьтчыны ас гöгöрыс. Тшöтш и бать-мамнысö на велöдöны. Казялi, мый бöръя воясын Тимшер уличьяс вылын лоис сöстöмджык. Сiдзкö, верöскöд ог весьшöрö уджалöй. Окота, медым сикт-посёлокъясын вöлі унджык лöп-ёг дозъяс, бать-мам да верстьö кö асьныс кутчысясны сöстöмлунö, сэтшöмöн жö и лоасны челядьныс, — кывкöрталiс Маргарита Анатольевна Паршукова.
Наталья Тимушева.
Снимокъяс Александр Паршуковлöн.