Новлöдлiсны йöзöс и почта

 Сöвет кадö Вочö лэбавлiс кык сикас самолёт: öти пилотöн веськöдлысь куим местаа ЯК-12 да кык пилотöн веськöдлысь 12 местаа АН-2. ЯК-12 дугдiс лэбавнысö 1968-öд воын нин. Пуксянiнсö вöлi вöчöма совхозлöн му вылын. Ан-2 самолёт локтöдз медводз ковмис выльысь лöсьöдны, дзоньтавны пуксянiнсö. Та могысь «Вычегодскöй» госпромхоз «Компромохота» котырлысь ньöбис трактор да бульдозер установка. Пуксьöдiсны трактор вылас Иван Егорович Гичевöс. Тайö вынйöра техниканас и дзоньталiсны-выльмöдiсны аэропорт площадкасö. Тайö вöлi 1975-öд воын. 1974-öд воöдз лöсьöдлiсны сiйöс Пруптскöй леспромхозлöн бульдозерöн, сiйöн жö и öти сайын паськöдiсны сылысь бокшаяссö. Самолёт пуксянiныс, кодi кузьтанас нюжалiс 800, пасьтанас 200 метра, вöлi гöрба, колiс лючки шыльöдны. Уджыс босьтiс уна кад. Пуксянiн дзоньталiгöн самолётъяс эз лэбавны. Тöвнас аэропорт уджалiс кыдзи и пыр. Сэки пуксянiнсö весавлiсны-шыльöдлiсны бульдозерöн жö, сы бердö 3х6 метра ыджда ляпкыдик сруб пысалöмöн да кыскалöмöн, кодöс улiсяньыс тупкiсны лыжи сяма мегыра пöвъясöн. Тайö техниканас весавлiсны и аэропортö мунан туй. 1976-öд воын пуксянiнсö ковмис нöшта на ыдждöдны, медым АН-2 самолётлы некутшöм неминучатöг, повтöг позис пуксьыны да кыпöдчыны сынöдö. Бокшаяссьыс бульдозерöн пöрöдiсны да посньöдлiсны том пуяссö да колисны му вылас. Площадкаыс лоис 1200х250 метра ыджда, ставнас 16 гектар. Та бöрын пуксянiнсö дзоньтавлiсны быд гожöм.

Гожöмнас почта нулiсны-вайлiсны самолётöн, а кор сiйö эз лэбав — Зимстан пыр МТЗ-82 тракторöн да ЗИЛ-157 автомашинаöн. Вочса аэропортöс, тшöтш и Канавасаöс, могмöдiсны медсясö «Вычегодскöй» госпромхоз тшöт весьтö. Самолётъяс лэбавны босьтчöм бöрын танi лöсьöдiсны и телефон йитöд. Электричествоöн тырвыйö могмöдiсны 1983-öд восянь, кор бисö кутiсны сетны сутки чöж.

 Самолётъяс кындзи аэропортö пуксьылiсны и МИ-2 да МИ-4 вертолётъяс, медсясö санитарнöйяс, кодъяс волiсны висьысьясла. Öти сайын вайлiсны почта, торйöн нин рöспута дырйи, либö босьтлiсны йöзöс. Аэропортсянь матын веськыдвылас вöлi лöсьöдöма самолётъяслы кык сулаланiн, турöбалiгöн либö мукöд лёк поводдя дырйи кöнi медым вермисны виччысьны сылысь бурмöмсö. Сэнi трос сяма крепитантор, кодлысь öти помсö кöрталöма пыдi муö сюйöм керйö, мöд помсö йитлiсны самолётö, мед ыджыд тöвныр эз нöбöд сiйöс. Пыр на эз вунны самолётöн мунан билетлöн донъясыс: Кулöмдiнöдз сiйö сулалiс кык, Зимстанöдз — öти, Дзолльöдз — кык, Сыктывкарöдз — сизим шайт.

 Иван Гичев.
Снимокъяс гижысьлöн.