Вöлöмкö, Россияын праздникъяс лыдын эм и аслыспöлöс «чöскыд»
лун — тайö пельняньяслöн лун. А пасйöны сiйöс февраль 18-öд лунö. Ми мöвпыштiм, мыйла виччысьны февраль, кор позьö матыстыштны тайö лунсö. Дерт, öнi лавкаясын вузалöны дась вöчöм да быдсяма пöлöсöс. Но ас киöн вöчöм пельнянь он орччöд накöд. Уна семьяын олöмö пырöма, да öнiöдз на ставныс чукöртчöны да вöчасьöны ыджыд пызан сайын. Гырысьяс петкöдлöны, велöдöны ичöтъясöс. Öтувъя уджын кылö, тыдалö гортсаяслöн шоныдлуныс, кыпыдлуныс.

 Ветеранъяслöн посёлокса котырöн шуим шойччан лунö «чöскыд» гажсö котыртны тыр арлыдтöмъяслöн Кебанъёльса социальнöй реабилитация юкöнын. Челядь миянöс виччысисны, вочаалiсны кыпыд нюмъясöн, тöдiсны, мый накöд öтлаын кутам вöчавны чöскыд, гортса пельнянь. Öтвылысь мунiсны мыськыны кияс, сэсся пасьталiсны водздöра. Весиг нёль арöса кык нывка корисны партук, тшöтш жö кöсйисны уджавны мукöдыскöд.

 Медводз челядьлы висьталiм, мый ковмас, кыдзи вöчны небыдик шырöм яй, мыйла колöны быгыльтан да пож. Сэсся гудыртiм няньшом, нывкаяс да зонкаяс отсалiсны пожнавны пызь. Том пусьысьяс велöдчисны быглявны, вундавны гöгыльяс, вöчавны мича пельняньяс. Дерт, медводз няньшом топöдiгöн ортсыас петiс изöм яй, но челядь надзöникöн велалiсны, да кутiсны артмыны мича да пелькиник пельняньяс. Зiлисны ставöн: и зонкаяс, и нывкаяс, и весиг поснияс. Вöлiм быттьö öти ыджыд семьяöн да öтув лöсьöдiм праздник кежлö пызан. Челядь висьталiсны, кутшöм чöскыдторъяс дасьтылiсны гортаныс мамыскöд, ыджыд мамкöд да пöчкöд. Сёрнитiгад эг и казялöй, кыдз бырис шырöм яйыд. Дасьтöм пельнянь тыра подносъяссö сетiм Надежда Фёдоровна пусьысьлы. Пажын дырйи челядь окотапырысь сёйисны ас киöн вöчöм чöскыд пельнянь, налы вичмисны и юмовторъяс.

 Чайтам, мый тайö аддзысьлöмöн нывкаяс да зонкаяс кылiсны
гортса шоныдсö, кыпыдлунсö. И тайö велöдчöмыс ковмас налöн
водзö олöмын.
Нина Плескач.
Кебанъёль.
Снимок гижысьлöн.