Кольöм выльлунö уна йöз дырйи пöся чолöмалiсны да ыджыд аттьö висьталiсны районса администрацияын Смолянкаысь Светлана Ивановна Бацунлы. Олег писö бура быдтöмысь да велöдöмысь, кодi ыджыд кöсйöмöн да зiльöмöн, асьсö быд боксянь бура петкöдлöмöн служитö армияын. Районса юралысь Д.А.Шатохин вичмöдiс Светлана Ивановналы дзоридзьяс да пиыслöн служитан часьтлöн командованиесянь аттьöалан гижöд да шуис:
-Миян армиялы подувсö медводз пуктöны семьяяс. Кымын зумыдджыка сулалöны найö кокъяс выланыс, кымын ыджыдджык тöдчанлун сетöны ныв-пинысö быдтöмлы да воспитайтöмлы, сымын и ёнджык миян армия. Ыджыд аттьö, Светлана Ивановна, мый Тiян пиныд вылын кутiс салдатлысь нимсö, бур боксянь петкöдлiс районöс и республикаöс.

Бöрынджык нывбаба висьталiс:
-Олег служитö Мурманск обласьтса Мончегорскын сынöдса военнöй вынъяслöн часьтын, вынйöра машинаöн нуö коланаiнö военнöй самолётъяс. Кыдзи гижлiс письмöясын, юöртлiс телефон пыр, служитсьö оз лёка. Колö ставсö вöчны сiдзи, кыдзи колö, а уджысь сiйö некор эз повлы. Радейтö спорт, гира лэпталöмöн аслас часьтын куимысь босьтлiс приза местаяс. Часьтсянь волiс нин некымын аттьöалан гижöд.
Талун тöдса, мый во служитöм бöрын Олег Игоревич Оловянников воис нин гортас, ёртъясыскöд да посёлоксаяскöд аддзысьлöм да мамлы сьöлöмсянь висьтасьöм бöрын, мый вылö тырмис вит кымын лун, лэччис Сыктывкарö да специальносьт сертиыс жö пырис служитны контракт кырымалöмöн татчöс военнöй гарнизонö. Кольöдöны эськö вöлi служитны Мончегорскас, но эз кольччы, мед лоны мам дорас матынджык, став бурсö вöчны ас Коми муын.
Телефон пыр нин Светлана Ивановна висьталiс, мый Сыктывкарын жö сылöн и мöд пиыс — Вячеслав Иванович Бацун. Сылы сьöкыдлуныс сюрлiс унджык нин, кöкъямыс во уджалiс милицияын, куимысь вöлi Чечняын. Сiйö гöтыра нин да челядя. Олеглöн эм жö нин Сыктывкарас муса ныв. Сы вöсна и, тöдöмысь, медсясö мунiс сэтчö. Кык воклы, öта-мöд дiнö волöмöн да öта-мöдлы отсасьöмöн, дерт жö, лоö кокньыдджык.
Ачыс Светлана Ивановна нэмсö уджалiс Усть-Немскöй леспромхозын, а сэсся «Монди Сыктывкарса ЛПК» компаниялöн Кулöмдiнса юкöнын вöр примитысьöн, öнi пенсия вылын.
-«Ми тэнö, мам, öтнадтö ог кольöй, кутам волыны да коланаторсö вöчны», — эскöдiсны пиянöй. И ме на дорö кута ветлывлыны, олыштны аскöдныс и видзыштны челядьнысö, — нимкодясис С.И.Бацун. Газет пыр корис висьтавны ыджыд аттьö «Югыдъяг» овмöдчöминса юралысь В.И.Аулы машинаöн Кулöмдiнö аттьöалöм вылö мöдöдлöмысь да районса юралысь Д.А.Шатохинлы бур кывъяс аддзöмысь.
Василий ЛОДЫГИН.