ТОМ ЙÖЗЛÖН ЗÌЛЬÖМÖН

Кыдзи районын пöртöны олöмö Коми республикаын том йöзлысь во юöртöмкöд йитöдын том йöзлы сиöм урчитöмторъяс, висьталö «Кулöмдìн» муниципальнöй районлöн администрацияса веськöдлысьöс вежысь Алёна Ивановна Федюнёва.

— Республикаса юралысь В.М.Гайзерлöн указöн 2012 во Коми республикаын юöртöма том йöзлöн воöн. Мый нин вöчинныд тайö указсö олöмö пöртöм могысь районын?

— «Кулöмдìн» муниципальнöй районса администрация котыртìс районын том йöзлысь во пасйöм кузя комитет, кодöн босьтчис юрнуöдны районса юралысь да районса администрацияöн веськöдлысь Д.А.Шатохин. Том йöзлысь во пасъям республикаса план вылö мыджсьöмöн, лöсьöдìм ассьыным план. Сìйö пöртсьö олöмö öкмыс бала серти. Найö татшöмöсь: «Аслыным керка лэптам асьным», «Удж серти быдмöм», «Ми — котыр», «Том семья», «Вермöм тэнад киясын», «Дзоньвидза район вöсна», «Воча мунöмöн», «Том йöзöс юöрöн могмöдöм», «Ме — граж-данин». Быд балалöн аслас туйвизь. Пример вылö, «Аслыным керка лэптам асьным» бала веськöдöма сы вылö, медым отсавны том семьяяслы да специалистъ-яслы кыпöдны ас керка либö ньöбны оланìн. «Удж серти быдмöм» бала отсалас могмöдны том йöзöс уджöн, сöвмöдны на пöвстын туризм. Отсалас кыскыны том йöз-öс районлöн общественнöй олöмö, бурмöдны том йöзлöн общественнöй котыръяслысь удж «Ми — котыр» бала.

— Кор районын официальнöя воссис том йöзлöн во?

— Миян районын том йöзлöн во кыпыда воссис «Пожöма яг» туристалан базаын февраль 24 лунö. Тайö лунö мунìс том йöзлöн «Йиркап» ворсöм.

— Том йöзлöн туйвизь серти мый медся тöдчанаыс вöлì кольöм во джынйöн?

— Удж мунìс ведомствояскостса план да «Районлöн том йöз» программа серти. «Аслыным керка лэптам асьным» бала серти март 23 лунö Кулöмдìнса «Нюм» садлöн подув вылын восьтìм челядьлысь регыдик олан котыр. Кык-куим арöса 16 нывка да зонка кутìсны волывлыны сэтчö апрельсянь. Сìдзжö мыйсюрö вöчим «Пожöма яг» турбаза бурмöдöм могысь. Дасьтìм да сетìм видзöдлыны Кулöмдìнын ёнмöдчан комплекс лэптöм кузя бала. Июньын босьтчисны кыпöдны Пожöгын лыжи база. Талун мунöны дасьтысян уджъяс, медым лэптыны Кулöмдìнын 120 кагалы сад. Таысь öтдор, куим семьяöс могмöдìсны федерациялöн «Сиктöс 2013 воöдз социальнöя сöвмöдöм» да республикалöн татшöм жö программа серти вит семьяöс. Торйöдöма керкаяс лэптöм могысь 38 му юкöн, кокньöда 20 мортлы му юкöнсö сетасны дон босьттöг.

«Удж серти быдмöм» бала пöртсьö олöмö местаяс вылын семинаръяс нуöдöмöн. Велöдöны найöс, кодъяс кöсйöны котыртны асшöр делö. Сìдзжö могмöдöны мыйкö дыра кежлö уджöн «Медводдза уджаланìн» программа серти шöр школа либö специальносьт серти училище ли техникум помалысьясöс. Февральын Кулöмдìнса шöр школалöн подув вылын мунìс велöдчанìнъяслöн ярмарка. Петкöдчисны миян республикаысь да Йошкар-Олаысь 14, миян районысь 5 велöданìн. Волìс 351 велöдчысь, на пиысь 55-лысь донъялìсны тöдöмлунъяссö. Майын Сыктывкарса 15 номера училищелöн филиалын тöдмöдìс, кутшöм специалистъяс колöны районлы, уджöн могмöдан шöрин. Тайö жö тöлысьын «Монди Сыктывкарса ЛПК» компаниялöн отсалöмöн Сыктывкарысь вöрса институт нуöдìс «Ичöт да шöр бизнесын менеджмент» прог-рамма серти семинар.

«Ми — котыр» бала олöмö пöртöмöн, ветлöдлìсны автобусöн да ышöдìсны бурторъяс вылö районса сиктъясö да посёлокъясö. Мунö удж котыръяскöд, кодъяс сетöны социальнöй отсöг. Лöсьöдсьöны ас окота серти би кусöдысь котыръяс, мунöны «Лöсьöд грант вылö бала» семинаръяс. Тавося апрельын Сыктывкарса 15 номера училищелöн Кебанъёльса филиал подув вылын лоис ас окота серти кусöдчысьяслöн, дорйысьяслöн да отсасьысьяслöн «Брандмейстер» котыр.

Том йöзлысь сям, кужöмлун да чужан му дìнö муслун сöвмöдöм могöн мунìсны, Отечестволöн лунлы сиöмöн, лыйсьöм кузя ордйысьöмъяс, патриотическöй сьыланкывъяслöн фестиваль, тöвся «Йиркап», а сìдзжö «Зарница» да «Бöръя герой» ворсöмъяс. Найöс котыртлìм «Ме — гражданин» бала серти.

Миян республикаын том йöзлöн во мунöмкöд йитöдын «Семьяяслöн чукöртчылöм» бала серти май 19 лунö «Ростелекомлöн» Кулöмдìнса юкöнын мунìс видеосёрни. Миян районысь öкмыс том семья сёрнитìс республикаса сизим муниципалитетысь аскоддьöмъяскöд. Тайö жö лунö том семьяяс чукöртчылìсны «Пожöма яг» турбазаö, сёрнитìсны, кыдзи котыртöны семья пытшкын олöм-вылöм, петкöдчисны ворсöмъясын. Май 19 лунö районын котыртчис том йöзлöн клуб. Тайöс ставсö вöчöма «Том семья» бала серти.

«Вермöм — тìян киясын» бала веськöдöма енбиа том йöзöс корсьöм да налысь водзмöстчöмъяс олöмö пöртöм вылö. Котыртлìм да мунìсны КВН, «Челядьдырлы абу пом» конкурс.

Таысь öтдор, районын мунìсны «Дзоньвидза район вöсна» бала серти асыввывса вермасьöмлöн да спортивнöй йöктöмъяслöн фестиваль, районса юралысьлöн да Ханлöн кубокъяс вылö ичöт футболысь ворсöмъяс, Победа лунлы сиöмöн, волейболысь да теннисысь ордйысьöм.

«Воча воськов» бала серти «Озырлунъяса дì» ворсöм сяма спортивнöй ордйысьöм мунìс Кулöмдìнса коррекционнöй школа-интернатын.

— Кыдзи юöртанныд том йöзлы, районса олысьяслы сìйö либö мöдтор нуöдöм йылысь?

— Юöртöм мунö «Том йöзöс юöрöн могмöдöм» бала серти. Районса администрацияысь специалистъяс коставлытöг петкöдöны сìйö либö мöдтор йылысь юöра гижöдъяс «Кулöмдìн» муниципальнöй районлöн усть-кулом.рф официальнöй сайт вылö. Лоанторъяс йылысь юöртö и районса «Парма гор» газет. Районса администрация мöдöдö йöзöдны гижöдъяс сìдзжö республикаса газетъясö, радиоö да телевидениеö. Том йöзöн вöчанторъяс йылысь тавося во джынйöн юöртìсны «Юрган» телеканал, «Комиинформ» да «БНКоми» юöртан агентствояс.

— Кодъяс петкöдчöны том йöзлöн вокöд йитчöм мероприятиеясын?

— Ми зìлям шымыртны кыдз позьö унджык сикт да посёлок. Кыпöдам водзмöстчысь, енбиа, спортö сетчöм том йöзöс да велöдчысьясöс, налысь котыръясöс. Кольöм во джынйöн миян районö волìсны Кöрткерöс, Мылдìн, Лузаберд, Эжва районъясса, Сыктывкарса том йöз.

— Алёна Ивановна, кутшöм кывкöртöд вöчанныд воджынся удж серти?

— Аслыссяма кывкöртöдöн позьö лыддьыны туризм кузя «Бöръя герой» ордйысьöм, кодì мунìс июнь 30 лунö Керчомъяын. Йöзöс шымыртöм серти сìйöс позьö öткодявны тöвся «Йиркап» ордйысьöмкöд, кодöн ми восьтìм том йöзлысь во.