Важся коми Керчомъя сиктын Эжва ю дорын, кöнi быд во котыртöны «Пыжа гаж», батьыслöн кыпöдлöм керкаын олö Катаевъяслöн зэв зiль семья. Алексей Павлинович армияöдз трактористалiс Керчомъяса совхозын. Служитöм бöрын велöдчис видз-му овмöс техникумын да бергöдчис совхозö, кöнi вöлi инженерöн. Совхоз киссьöм бöрын уджалiс пытшкöсса делöяслöн юкöнын 20 гöгöр во, 17-сö вöлi участокса уполномоченнöйöн. Öнi сiйö Керчомъяын кусöдчысьяслöн торъя постса командир. Кöть эм пыркадся удж да удждон, Катаевъяс оз лэдзчысьны скöт видзöмысь да градвыв пуктас вöдитöмысь. Евгения Анатольевна гöтырыс овмöдчöминса администрацияын бухгалтералö велöдан управлениесянь. Гозъялöн куим челядь, Александралы 24, Ильялы 22 да Дарьялы 8 арöс. Эмöсь нин внукъяс, Кириллы куим, Денислы кык арöс.
Катаевъяслöн ыджыд овмöсын кык мöс, öти öш, öти кукань да чипанъяс. Картупель пуктöны öти гектар вылö, вöдитöны и мукöд градвыв пуктас. Эмöсь тракторъяс да на дорö быдсикас агрегатъяс. Картупель кöйдыс ньöбöны Кулöмдiнса сортучастокысь, идралöм бöрын буръяссö кольöдöны и ассьыныс. Эм Рябинушка, Идеал, Загадка Питера сортъяс. Но медся ёна сьöлöм выланыс воис Снегирь, кодi чöскыд да воö уна. Мусö вынсьöдöны пöимöн, быд во петкöдöны 40 тоннаöдз куйöд. Пуктöны гребень вылö тракторöн визьяс вöчöмöн. Уджалöны асьныс, семьяяснаныс ныв-пиныс да Евгения Анатольевналöн мамыс да семьяяснаныс чой-вокыс. Медавлöны и уджтöмалысьясöс. Чукöрмылöны 18 мортöдз, зэв öдйö и эштöдöны. Керны медавлöны 15 мортöдз да асьныс чукöрмылöны 30-öдз. Ставнысö вердöны-юкталöны, уджтöмалысьяслы вештöны 500 шайтöн. Вöзйысьöны отсасьны найö, кодъяс асьныс оз вöдитны картупель да уджалöмысь картупельöн жö и босьтöны. Кольöм воын Катаевъяслöн воис 15 тонна «мöд нянь». Видзöны гöвбöчын да куим гуын. Лишаланасö вузалöны йöзлы, школа-садъяс картупельöн могмöдöны во гöгöр чöж. Кольöм воын Кулöмдiнса школа босьтiс 0,5, Кебанъёльса сад 2,5, йöз сизим тонна картупель. Дон босьттöг сетöны рöдвужлы, тöдсаяслы, босьтöны аслыныс и челядь. Картупель инасьö бура. Эмöсь пыркадся ньöбысьяс. Босьтöны зимстансаяс, югыдъягсаяс, кулöмдiнсаяс, помöсдiнсаяс, волöны весиг Кöрткерöс районса Визябöжысь, Сыктывкарысь. Быд во Катаевъяс лэччывлöны вузасьны «Вося урожай» ярмарка вылö.
Зiль гозъя вöдитöны и мукöд градвыв пуктас: капуста, лук, чеснок, морков, свеклö, кабачки, огурцы да помидор. Кольöм воын йöзлы вузалiсны 150 килограмм кабачок да 10 килограмм лук. Лишаланасö консервируйтöны, сетöны рöдвужлы да тöдсаяслы. Капуста тöв кежлö солалöны пу пельсаын, пуöны важся ног бипур вылын чугун пöртйын, содтöны анис да укроп, чöсмасьöны-номсасьöны тöвбыд.
2017-öд воын кык мöс сетiсны 8 тонна йöв, öтиыс висис да воддза воын серти лоис 0,5 тоннаöн этшаджык. 2016-öд воын Кулöмдiнса МТС-ö иналiсны 3,5, кольöм воын 2,5, таво 8 тöлысьöн 1,1 тонна йöв. 2016-öд воын йöзлы вузалiсны 1,5 тонна, 2017-öдын — 3, таво квайт тöлысьöн 0,9 тонна йöв.
Кöрым заптiгöн тракторöн веськöдлö ачыс Алексей Павлинович, руль сайö пуксьö и гöтырыслöн Иван Анатольевич Степанов вокыс. Эм ытшкан, куртан, топöдан, юр чукöртан агрегатъяс, трактор дорö прицеп.
Алексей Павлинович вöралö и кыйсьö. Со татшöм зiль да бур семья олö Керчомъяын.
Анастасия ЯРОВА,
видз-му овмöс
юкöнса начальник.