Видз-му овмöс министерство ас овмöсъяс костын нуöдiс квайт нимпас серти конкурс. 34 петкöдчысьысь кыкыс миян районысь. «Аслыспöлöс керка йöр» нимпасын медся бурöн лоис Кулöмдiнысь Наталья Эриховна Битнер, «Быдмöг вöдитöмын медся бур ас овмöс» нимпасын коймöдöн Керчомъяысь Алексей Павлинович Катаев.
Наталья Эриховна Битнер Ленинградса химико-технологическöй техникумын велöдчöм бöрын кöкъямыс во уджалiс Санкт-Петербургын, а сэсся бергöдчис чужанiнö. Босьтöм специальносьт серти удж эз сюр да пырис шöр бурдöдчанiнлöн статистика юкöнö, кöнi уджалiс 15 во, сэсся вузасис «Торг-экспресс» котырын. Öнi Наталья Эриховна пенсия вылын.
Ме юалi, кыдзи босьтчис тайö лов кыпöдан уджас.
— Дас во сайын «висьми» керка йöр мичмöдöмöн. Войвылын гожöмыс кöть дженьыд, но вайö уна нимкодьлун. Сэсся босьтчи вöдитны и керкаын быдмысь дзоридзьяс да талун найö розъялöны 70 гырничын, — вочавидзис ань.
Аньлöн керка йöрын абу кушин. Быдлаын ичöтик градъяс, кустъяс, дзоридзьяс. На косттi ветланiнъяс вольсалöма плиткаясöн. Эм качай, гартчан плющöн мичмöдöм лэбув.
Наталья Эриховна быдтö бурдöдчан унапöлöс турун, чукöртö Иван чай, уразнöй турун, бобöнянь. Ань найöс косьтö, Иван чай дзоридзысь вöчö чай. Сiдзжö пуктö унапöлöс градвыв пуктас, тшöтш баклажан, цикорий, тыква, парникын – помидор да öгуреч, быдтö и гöгрöс öгуреч. Эмöсь ежевика, клубника, вöрса оз, а сiдзжö крыжовник, гöрд да сьöд сэтöръяс, гöрд да виж оз, ирга, вишня да слива кустъяс.
Наталья Эриховна тöв кежлö солалö öгурцы да пуö компотъяс, варенньöяс, вöчö быдсикас салатъяс да мукöдтор.
Аньлöн зарни кияса Алексей Эрихович вокыс тшöтш нималö районын. Сiйö вöчö корöм серти мебель. Сылöн Ирэна гöтырыс Наталья Эриховна вылö видзöдöмöн тшöтш «висьмис» дзоридзьяс быдтöмöн.
Конкурсын вермысь — восьса сьöлöма шань ань. Нимкодьöдö-сетö дзоридзьяс кöлысь вöрсiгъясöн, гажъяс кежлö, торйöн нин тöдöмлунъяслöн лун кежлö. Босьтöм градвыв пуктасöн, рöсадаöн, кöйдысъясöн юксьö рöдвужыскöд, тöдсаясыскöд.