Югыдъягса асшöр уджалысь Виктор Васильевич Белыйлöн районса ломтысянiнъяслы да олысьяслы ломтысигкежлö дась 500 гöгöр тонна брикет. Вöчис нин «Шоныд сетан компанияысь» Кулöмдiнса юкöнкöд сёрнитчöм. Кутас ачыс нуны Белоборскса, Немдiнса да Пожöгса ломтысянiнъяслы.

1997 воын асшöр уджö босьтчöмсянь пыр содтысис вöр лэдзöмöн да пилитöмöн. 2012 воын кö пöрöдiс 106 сюрс, то кольöм воын 140 сюрс кубометр вöр. 2012 воын кö вöчис 34 сюрс, то кольöм воын — 45 сюрс кубометр пиломатериал. Кольöм вося октябрын босьтчис вöчны вöр колясысь да пилипызьысь ломтас лэдзанiн. Оборудование сувтiс 35 миллион шайт. Босьтiс 8 уджалысьöс.
— Февральсянь лэдзам брикет. Суткиöн вöчам 30 тоннаöдз. Öти тоннаöн брикетсö гартöны плёнкаöн, сiйöс бур да лöсьыд сöвтны машина вылö да ректыны. Тöлысьöн вермам инавны 600 тоннаысь унджыкöс. Эмöсь и 10 килограмм сьöкта гартöм брикетъяс. Июньсянь лэдзам пеллет. Ломтасным сертификата, — сёрнитiс В.В.Белыйöс вежысь И.В.Белая.
Пасъям, республика да район вöр колясъясысь ломтас вöчöмлы сетöны ыджыд тöдчанлун, лöсьöдiсны торъя программа. В.В.Белый кындзи сiйöс пöртö олöмö Кулöмдiнса брикет вöчанiн.
Марина ДАДАШОВА.
Гижысьлöн снимок вылын: (шуйгавывсянь веськыдвылö) Югыдъягса юралысь В.И.Ау да И.В.Белая сёрнитöны пеллет вöчöм йылысь.