Ытва видзчысьтöг оз су
Водзвыв тöдса, мый ытва дырйи таво сьöкыд лоö Зимстанса, Вочса да Дзольса овмöдчöминъяслы, сы вöсна мый киссис да эз ло Прупт ю вомöн пос, выльсö вöчны оз на удитны. Буретш та вöсна и неважöн кайлiс Зимстанö ытва кежлö дасьтысьöм да биысь видзчысьöм кузя комиссия, кодöн веськöдлö районса администрацияöн веськöдлысьöс вежысь И.В.Попов.
Тыдовтчис, мый мыйсюрö вöчисны нин. Районса электрическöй сетьяс, суас кö видзчысьтöм лоöмтор, ваяс 15 сюръя, трансформатор. Öзйылöмъяс кежлö дась биысь видзан службалöн районса 14 отряд. Фроловскын да Климовскын эмöсь мотопомпаяс. Ковмас кö, кусöдчысьясöс кыпöдасны Лöгинъягысь да Керчомъяысь. Мытшöдъяс абуöсь «Ростелеком» Коми филиалысь Кулöмдiнса юкöнлöн. Зимстанын уджалö кык электромонтёр, кодъяс кывкутöны нöшта и Воч да Лöгинъяг вöсна. Кусас кö би, эм бензоагрегат, ломтас. Ковмас кö кабель либö мöдтор, ваясны. Сёрнитчöма и почтакöд, кодлöн ытва дырйи Зимстанын кутас уджавны машина. Позяс ветлыны и Габовöдз, Вочöдз да Дзолльöдз.
Лоасны кö сьöкыд висьысьяс, висьмасны кö челядь да нöбасьысьяс, нуасны Кулöмдiнса либö Керчомъяса бурдöдчанiнъясö Пруптлöн мöдар берегын виччысян машинаöн. Зимстанса бурдöдчанiнлöн дзик выль машина. Лöсьöдöма кык тöлысь кежлö лекарствояс.
Ытва кежлö дась пытшкöсса делöяс министерстволöн районса юкöн. Зимстанын эмöсь участкöвöй уполномоченнöй да патрульно-постöвöй службаса уджалысь, машина. Суас кö кутшöмкö лоöмтор, дасьöсь мöдöдны погона содтöд йöзöс.
Зимстанса школаöн веськöдлысь Галина Александровна Кичун вöзйис Лöгинъягса челядьöс велöдны Лöгинъягын. Ичöт классъясöс вöвлöм велöданiн куш, сэнi эм улöс-парта. Зимстанса интернатö кад кежлö овмöдöм вылö абу мебель ни вольпась.
Зимстанса заправитчанiнын тöлысьöн шöркодя мунö 10 кубометр бензин. Ытва кежлö ваясны 25 кубометр бензин да 70 тонна дизель ломтас. Поса туй эм, заправитчанiнын уджалысь Н.Л.Коведа корис йöзöс туй тупкытöдз бензин бакъяс тыртны Кулöмдiнын, сы вöсна мый кутас кö бырны ломтас, могмöдасны сöмын предприятиеясöс да котыръясöс, кольöдасны медся колана вылö.
Сиктын лёк туйяс вылö элясис Дзольса юралысь Гелий Иванович Логинов. Вайöм груз лоö новлыны вöвъясöн. Би эм, неважöн вайисны выль дизель-генератор.
Кыдзи висьталiс Вочса юралысь Николай Фёдорович Морохин, дась ас окота серти кусöдчысьяслöн котыр. Видлiсны куим мотопомпа, уджалöны. Лавкаясö вайисны тырмымöн сёян-юан. Сёрнитöма олысьяскöд, ковтöг туйö оз петны. Эм йитöд став юкöнъяскöд.
Прупт ю вомöн лун и вой вöчö пос Ухтаса «Комистроймост» котыр, мед ытваöдз мöдар берегын вöчны пос вылö асфальта каянiн. Эштас кö, то 20 тоннаöдз машинаяслы ёна колiгöн позяс вуджны.
Сёрнитiсны предпринимательяс. Вузасянiнъясö вайисны тырмымöн сёян-юан да олöмын медся коланаторъяс. Кутасны ваявны и ытва дырйи, сöмын колö котыртны ю вомöн вуджöдчöм.
-Кутанныд кö вуджöдчыны пыжöн, мед вуджöдчысьлöн вöлi удостоверение да регистрируйтöм пыж. Миян дась мотора кык пыж. Йöзöс пыжö пуксьöдтöдз колö велöдны, кыдзи-мый вöчны. Быдöнöс пасьтöдны вöйöмысь доръян жилетöн. Пуксьöдны сы мындаöс, мыйта позьö пыжлöн техпаспорт серти. Кольöм во майын вöйис нёль морт. Ва вылын колö видзчысьны, — корис ичöт суднояс государственнöй инспекциялöн Кулöмдiнса юкöнöн веськöдлысь Иван Борисович Попов.
-Шыöдчам республикаса юралысь дорö, мед ытва кадö Сыктывкарысь мöдöдлас мездысьяслысь котыр, кодi миян районö волiс нин. Тiянлы колö öтувтчыны. Машинаяс эмöсь, могъяс сувтöдöмныд, унатор нин вöчöмныд. Уджавны кутам быд лун, мед ытва дырйи мытшöдъяс оз лоны, некутшöм лёк оз ло, — кывкöртiс районса администрацияöн веськöдлысьöс вежысь И.В.Попов.