Ыджыд шедöдöмтор 

[ A+ ] /[ A- ]

Пыдди пуктана 
Выльгортысь Мария Степановна Гаевскаяöс районса олöма йöзлöн Аныбса «Ошлöн вöр» чукöртчылiгöн шуисны медся кывкутысьöн да сетiсны «Пыдди пуктана ветеран» медаль. Нывбаба весиг мöвпыштлыны эз вермы, мый сылысь водзмöстчöм донъяласны татшöм вылö. 
Чужис-быдмис Выльгортын. Ичöт классъяс велöдчис сэнi, а сэсся Помöсдiнын. Школа бöрын водзö велöдчöм эз артмы. Нылöс босьтiсны школаö велöдны физкультура. Зiлис сэнi нёль во. Вöлi том на, уджалiс окотапырысь. Кор локтiс диплома физкультура велöдысь, ковмис мунны. Пырис леспромхозö нефтебазаöн веськöдлысьöн. 18 во уджалöм бöрын ковмис дугöдчыны. Уджалiс садйын няняöн, Выльгортса школаын пусьысьöн. Сергей Анатольевич верöсыскöд быдтiсны нёль челядьöс, ставöн лоисны пыдди пуктана йöзöн. Варвара олö Пажгаын да уджалö пусьысьöн школа-интернатын. Нöшта кык ныв, Алёна да Анастасия, уджалöны Помöсдiнса «Весна» вузасянiнын. Пиыс Выльгортса совхозын зiльö водительöн. 
Мария Степановна, кыдз асьсö помнитö, пыр сьылiс. Вежöрас колис, кыдзи батьыс фронт вылысь вайлiс гудöк, сы вылын ворслiс, а мамыс сьылiс. Сэсянь и велалiс. Сиктас налöн кык сьылан котыр — «Мича аньяс» да олöма йöзлöн «Олан гаж». Ветлöны зэв унаöн. Олöны гажаа да бергöдöны уна удж: нуöдöны концертъяс, оз вунöдны олöма йöзöс. Кодкö кö висьмö, ветлывлöны видлыны. Налöн сиктын зэв кывкутысь старöста, Е.Ф.Уляшев, кодi сьöлöмнас висьö сиктса йöз вöсна. Öтув уджалöны и сиктса юралыськöд. Вöчисны челядьлы ворсанiн, пелькöдчöны, унатор дасьтöны да нуöдöны Победа лун дырйи, олöма йöзлöн гаж дырйи чукöртчылöны клубö, юöны чай, ворсöны. Ставныслы вичмö дзоляник козин. Мария Степановна юрнуöдö олöма йöзлöн сиктса котырöн. 
Сергей Анатольевич верöсыс гöтырыскöд клубö оз ветлы, радейтö котравны лыжи вылын. Кöть таво тырö нин 70 арöс, пыр на збоя котралö. Гаевскийяс олöны öтув 46 во. Гозъялöн висьталöм серти, колö кужны мунны воча, радейтны, пыдди пуктыны öта-мöдтö. Весиг кор челядьныс вöлiны ичöтöсь, верöсыс лэдзлывлiс Мария Степановнаöс сьывны да вöчны мукöд общественнöй удж, а ачыс пукавлiс дзолюкъяскöд. Сэсся и гöтырыс пыр лэдзлывлiс верöссö ордйысьöмъяс вылö да радлiс быд вермöмлы. Öнi пиныс гöтрасис, öтув тшöтш лэптiсны налы керка, олöны ёртасьöмöн. 
Олöма йöзлöн Аныбö чукöртчылöм вылö Мария Степановна ветлö быд во. Пыр нимкодьпырысь сэнi шойччö. 
— Татшöм öтувтчöмыс ёна колö. Сэнi ми тöдмалам уна выльтор. Сэсся тайö тöдöмлунъясöн ми юксям гортö локтöм бöрын. Меным зэв нимкодь тайö медаль сетöмсьыс. Пасьтавла олöма йöзлöн гаж дырйи. Сетöм бöрас дзик пыр и звöнитлi да висьталi рöдвужлы. Сэтшöм нимкодьöсь лоисны. А кутшöма чолöмалiсны миян ветеранъяс! Долыд, мый миянлысь уджнымöс аддзöны да вылö донъялöны. Татшöм шедöдöмтор бöрын шуи аслым уджавны нöшта на бурджыка. Ыджыд аттьö Г.А.Кравченколы миянöс ставнымöс öтувтöмысь, — сёрнитiс Мария Степановна. 
Асланыс котырöн петкöдчылiсны Бадьёльйылын, Пожöгын, Скöрöдумын, Помöсдiнын. Быд вося Успенньö ярмарка вылын таво кык сьылан котырöн öтувтчöма сьылöмöн лоисны медводдзаясöн. Нывбабалöн висьталöм серти, олöма йöз зэв кыпалысьöсь, и таысь зэв долыд. Тадзи и ичöт сиктад овнытö кыпыдджык да гажаджык. 
Гижöд да снимок 
Галина КЛЮЖЕВАЛÖН.

Комментарии:

Добавить комментарий

Свежий выпуск: за 6 декабря