Авъяöсь, вежöраöсь, шаньöсь 

[ A+ ] /[ A- ]

Октябр 5-öд лунö ми кутам сьöлöмсянь чолöмавны велöдысьясöс. Найö быд мортлöн олöмын зэв тöдчана йöз. Позьö шуны, мый буретш велöдысь индö олöмлысь водзö туйвизь, сяммö кö кыскыны кагаöс аслас велöданторйö, ышöдö корсьысьны, туясьны. Велöдысьлöн кывкутана уджыс донъявны позьтöм. Талун асланыс радейтана велöдысьяс йылысь висьталöны районса школаясысь челядь. 
Владислав Липин — Кулöмдiн, 8 класс: 
— Меным сьöлöм вылö воö велöдчыны. Миян школаын бур велöдысьяс да челядь. Та вöсна меным сэнi лöсьыд. Ме радейта физкультура, биология да технология урокъяс. А медся радейтанаöн лоö физкультура да сiйöс велöдысь Павел Николаевич Лютоев. Сiйö зэв шань да авъя. Ачыс ёртасьö спорткöд. Павел Николаевич нöшта на футбол кузя тренер. Сылöн видзöдлас улын бура ёнмöдчам, петкöдчам ордйысьöмъясын да тшöкыда вермылам. Окота, мед эськö став велöдысьыс вöлiны сы кодьöн. 
Оксана Холопова — Руч, 7 класс: 
— Менам медрадейтана велöдысь — Евгения Александровна Холопова. Сiйö миян классöн веськöдлысь. Нуöдö алгебра, геометрия да физика урокъяс. Зэв шань, пыр нюмъялö, мича. А нöшта сiйö менам мам. Евгения Александровна гöгöрвоана висьталö уроклысь темаяс да бура миянöс велöдö. Сы отсöгöн ми петкöдчам быдпöлöс олимпиадаясын да вермылам. 
Снежана Уляшева — Пожöг, 9 класс: 
— Быд велöдчысьлöн эм медрадейтана велöдысь. И тайöс некыдз некодысь он дзеб. Быд велöдысь торъялö аслас мывкыдлунöн, шаньлунöн да зiльлунöн. Велöдысь сетö оз сöмын тöдöмлунъяс, сылöн и мöдлаö тырмö сям. Кодкö кужö сьывны-йöктыны, кодкö ворсны, кодкö и вурсьыны-кысьыны. А ме гижышта медся сяма морт йылысь, кодi удитö и велöдны, и гортас бергöдны став уджсö, нöшта на и вöчавны мича снимокъяс да йöзöдны найöс. Тайö Елена Александровна Игнатова. Велöдö Пожöг шöр школаын коми кыв да литература. Унджык урокыс сыкöд кольö гажаа. Елена Александровна радейтö сетавны урок вылын быдсяма уджсö, кодöс ми вöчам окотапырысь. Ачыс вöчалö лов кыпöдана снимокъяс да сы улö гижöдъяс. Сiйö сяммö казявны мыйкö шемöсмöдантор, мый оз аддзыны мукöдыс. Велöдысь ёна мырсьö-вöчö, медым висьтавны, кутшöм миян олöмын эм мичаторъяс. 
Василий Русинов — Кулöмдiн, 10 класс: 
— Медся бурöн ме шуа история велöдысь Мария Борисовна Чалановаöс. Сiйö сьöлöмнас кылö, кор кагаöс кыскö предмет дорас и кор оз. Велöдчысьлы кö сьöкыд вочавидзны дöска дорын, сетö отсалан юалöмъяс. Чайта сiйöс ассьыс удж зэв бура тöдысь велöдысьöн. 
Виктория Морохина — Керчомъя: 
— Öнi ме нёльöд во велöдча карын искусствояслöн гимназияын. Öнöдз казьтыла ассьым школаöс да медрадейтана велöдысьöс, Эмилия Генриховна Елсаковаöс, кодi велöдiс суйöрсайса кыв. Шань да лöнь, вежöра да веськыд, мелi да тöждысьысь — татшöм менам муса велöдысьöй. Сiйö велöдiс менö радейтны удж да велöдчöм, лоны кывкутысьöн да бура кывны йöзöс, кужны аддзыны налысь майшасьöмъяс. Зэв ыджыд аттьö сылы, мый сы отсöгöн ме аддзи ачымöс тайö олöмас. 
Алёна Бизина — Помöсдiн, 9 класс: 
— Медся радейтана велöдысьöй Ольга Владимировна Шебырева. Велöдö коми кыв да литература. Сьöлöм вылö воö сыöн, мый стрöг, но бура да гöгöрвоана висьталö, бура тöдö ассьыс предмет. Зэв шань, пыдди пуктö став велöдчысьöс. Сiйö меным вöзйис, мед ме босьтчи йöзöдны кывбуръясöс, висьталiс гожся университет йылысь. Мыйкö кö абу гöгöрвоана, век урок бöрын кольччö да висьталö содтöд. 
Елена Булышева — Шöръяг, 9 класс: 
— Меным сьöлöм вылö медся ёна воö роч кыв, литература да искусство велöдысь Тамара Александровна Напалкова. Позьö шуны, мый сiйö менам медся радейтана морт. Быд сылöн урок вылö ветла, кыдзи праздник вылö. Тайö велöдысьыс веськыд, стрöг, но сэк жö и зэв шань. Велöдчысь кö оз вöч гортса удж, некор оз горзы сы вылö, а сiдзи сёрнитö, мый кагалы лоö яндзим да мöдысь тадзи сэсся некор оз вöч. Сылöн урокъясыс зэв аслыспöлöсöсь. Пыр висьталö олöмсьыс кутшöмкö лоöмторъяс, мед вöлi нöшта на гöгöрвоанаджык. Тöдмалам уна выльтор. Дерт, миян школаын велöдысьяс ставныс бурöсь, но Тамара Александровна меным медся-медся. 
Наталья Уляшева — Помöсдiн, 7 класс: 
— Меным медся муса Елена Витальевна. Велöдö алгебра да геометрия. Ставсö висьталö зэв шаня да гöгöрвоана. Он кö гöгöрво, лöня висьталас выльысь, кольччывлö и урок бöрын. Зэв бур велöдысь. 
Александра Костылева — Ягкöдж, 10 класс: 
— Öнi ме велöдча Помöсдiнын, а таöдз велöдчи чужанiнын, Ягкöджын. 5-9 классын менö велöдiс Людмила Ивановна Уляшева. Сiйö сетö роч кывйысь да литератураысь тöдöмлунъяс. Зэв бура ставсö висьталö, сiйö сёрнитö челядькöд, кыдзи верстьöкöд. Век кывзас, ми быттьö ёртъяс. 
Светлана Попова — Кулöмдiн, 8 класс: 
— Мария Борисовна Чаланова велöдö история да обществознание. Сiйö менам медрадейтана велöдысь. Юала ачымöс: «А мыйла эськö ме радейта сiйöс?» Сiйö зэв шань, кывкутысь да нюмсера. Нöшта на и классöн веськöдлысь. Сыкöд пыр позьö сёрнитны, век отсыштас. Пыр кöнкö петкöдчам, ветлöдлам вöр-ва вылö и с.в. Кыдзи велöдысь, зэв жö сюсь. Мыйкö кö абу гöгöрвоана, либö оз артмы, либö ми ог стöча вöчöй гортса удж, пыр отсалас. 
Галина КЛЮЖЕВА.

Комментарии:

Добавить комментарий

Свежий выпуск: 28 марта

Осторожно — мошенники!