2016 вося июль 22 лунö петiс Коми республикаса правительстволöн 371-öд номера индöд, код серти 2016 вося июль 23 лунсянь август 7 лунöдз йöзлы оз позь пырны вöрö кöть кутшöм транспортöн да мыйкö вöчны сэнi. Тайö вöчсьö сы могысь, медым сэнi эз öзйы, сы вöсна мый жар лунъяс вöсна вöръяс дзик косöсь, и öти кусöдтöм истöг тув вермас вайöдны ыджыд лёкторйöдз.
Июль 25 лун кежлö Кулöмдiн районын 24 öзйылöм, сотчö 109 гектар. Медся унаыс — 15 öзйылöм — Кулöмдiнса лесничествоын. Кызвын öзйылöмсьыс мыжа морт. Вöр сотчö сикт-посёлокъясысь ылын.
Районса администрацияысь видзчысьтöм лоöмторъяс пановтан да йöзöс доръян юкöн корö районса олысьясöс дугöдчывны вöрö ветлöмысь. Республикаса правительстволöн индöд серти мортлы, кодi мöдöдчö вöрö, колö звöнитны 8-800-100-94-00 (вочавидзасны лунын кöть войын, звöнитöмысь дон оз босьтны) либö 93-907 телефонъяс пыр да висьтавны, мый мунö вöрö. Татчö жö колö юöртны, казялiнныд кö вöрса öзйöм.
Июль 23 — август 7 лунъясö вöр-ва дорйысьяс, лесничествоса уджалысьяс полициякöд öтув кутасны видзöдны вöрö мунан туйяс, медым öлöдны йöзöс вöрö ветлöмысь, велöдны, кыдзи кутчысьны сэнi. Вöрса öзйылöмъясысь мыжаясöс вермасны кыскыны чорыд кывкутöмö.
Лидия ЛИПИНА.