Июль 15 лунö, районлысь да Кулöмдiнлысь чужан лунъяс пасйигöн, юрсиктын котöртiсны «Кулöмдiн районлысь ичöт кытш». Чукöртчылiс районысь 14 арöссянь да ыджыдджык став ён спортсменыс. Волiсны и мукöд кар-районысь. Котöртiсны 5,6 километр. Айловъяс пиысь вермис Кулöмдiнысь Илья Чаланов, аньяс пиысь — юрсиктысь жö Анастасия Чаланова. Асланыс арлыдаяс пиысь медся тэрыба котöртiсны Парчысь Пётр да Мария Кармановъяс, Кулöмдiнысь Виктория Пименова, Андрей Кочанов, Иван Мишарин, Ольга Чисталёва, Александр Мамонтов да казьтылöм нин Илья да Анастасия Чалановъяс, Сыктывкарысь Владимир Ленский да Емдiнысь Игорь Кузнецов. Чолöмалiсны найöс да вичмöдiсны грамотаяс, медальяс да сьöма сертификатъяс Коми республикаысь физкультура, спорт да туристалöм кузя министр Н.М.Бережной, районысь лыжи кузя спортлöн федерацияса президент А.М.Тарабукин да райадминистрацияысь физкультура, спорт да туристалöм кузя юкöнöн веськöдлысь А.И.Удоратин.
Öти сайын министр пöся чолöмалiс школа помалысьясöс спортын вермöмъясысь да вичмöдiс ГТО-лысь зарни пасъяс да удостоверениеяс, на лыдын: Кулöмдiнысь Алексей да Михаил Игнатовъяслы, Андрей Кочановлы да Диана Сенькиналы, Югыдъягысь Максим Варваруклы да Артём Яремчуклы, Озъягысь Дария Галиновскаялы, Помöсдiнысь Валерия Жангуровалы, Даниил да Анна Игнатовъяслы, Павел Кармановлы, Альбина Поповалы, Илья да Никита Уляшевъяслы, Кебанъёльысь Виктория Климчуклы да Ручысь Адам Мууевлы.
Тайö жö лунö айловъяс районса культура керка дорын ворсiсны стритболысь. Вермасис квайт котыр: Кулöмдiнысь, Озъягысь, Кебанъёльысь, районса электрическöй сетьясысь да Югыдъягысь кык. Медбура ворсiсны да вермисны районса электрическöй сетьясын уджалысьяс, мöдöн лоисны югыдъягсаяс, коймöдöн — кулöмдiнсаяс.
Кулöмдiнса спорт шöрин.