Тусовъя дзоридзьяслы — коми аньяслы

[ A+ ] /[ A- ]

Со и матысмис дыр виччысяна медводдза тувсовъя гаж. Неважöн на бергалiм Выль вося коз дорын, ышмылiм да ичöт челядь моз пуртiкасим, чилзiм да гигзим небыд лым пиын уялiгмоз. Сэсся Ва вежöдан лунся веж кöдзыдъяс дырйи шонтысим-вугралiм дзоля пач дорын, кывзiм гажаа трачкöдчысь козлысь да ньывлысь ломтысьöмсö. А найö, кодъяс озырöсь пöжасян пачöн да пöлатьöн, вельмасисны сэрöгас гöна эшкын вылын.
Повтöмджыкъяс вой шöрнас суныштлiсны весиг ювывса кöзöда йöрданö. Петкöдлiсны удаллунсö, перйисны во гöгöр кежлö дзоньвидзалуннысö. А сэсся, бушколöн лымсö гартiгтыр, ыджыдалыштiс февраль. Шутьлялöмöн да пач трубаясын омлялöмöн, шыльöдiс-тыртiс туйяс да öшлiс-тэчис чуймöдан гырысь туктаяс керка да сарай вевт помъясö. Но вочасöн лунъюгыдыс пыр нюжалö и шоналö, а вой-асывъяснас повзьöдчö на пашляк, градусник сi усьлö 40-öдз. Айловъяслысь лун пасйигöн эз-эз да и öвтыштлiс нин ывлаас тулыс кöрöн, быттьö увтi визлалыштiс морöспань.
Сэсся, позьö шуны, тöдлытöг сибöдчö шоныд, дзигöдö тэнö Нывбаба лун — медводдза тувсовъя гаж. Кöть и тулыс нин — дзоридз некöн оз тыдав. А виж морöса пыста ылалыштлö шоналыштöм лунсьöмöснас да нюжöдыштлö нин корсюрö «точи-плуг, точи-плуг» сьыланкывсö.
Видзöдтö: мöдöмаöсь нюжавны жöлöб помъясысь йи нёньяс, вот-вот мöдас тёпкыны войтва. Гöгöр лöсьöдчö паськавны выль олöм, сынöд надзöникöн тырö радейтчöм шыясöн.
Со тай енэжас патурликасьöны кырныш гозъя, мелiасьöны, «курк» да «курк» сöмын кылö. Регыд пуксясны кольк вылö, мöдасны быдтыны сильöпиянöс.
Сiдзи и окота кыпöдчыны сынöдö да енкай моз чипöстны эзысь тёльгунöн: «Он öмöй аддзöй, радейтчöмöн тырöма менам сьöлöмöй. Лэбзьöй ме дорö. Нимкодясьыштам öтлаын сылысь лымнас, яръюгыд шондiнас, пыдöстöм енэжнас».
А лов нöшта корö мыйкö ыджыдöс, кыпыдöс, лов кыпöданаöс, мичаöс, юр кольмöданаöс, вежöр воштанаöс…
Медводдза тувсов гажыд медводдза кага кодь, дыр виччысяна да колана. Окота дзудзöдчыны сыкöд помтöг, инмöдчывны, малавны. Дерт, чужасны и сы бöрся олысьяс, и гажыд на уна водзын, но медводдзаыд — сiйö пыр медводдза, вежöрö дыр кежлö коляна.
Мича коми анюкъяс! Чолöмалам ставнытö Нывбаба лунöн да сиам: мед вöлiнныд радейтанаöн, коланаöн, мичаöн да шудаöн! Нимкодясьöй олöмнас — тi öд вуж паськöдысьясыс и лымъя Коми муын медводдза тувсовъя дзоридзьясыс!
Владимир ШОМЫСОВ.


Комментарии:

Добавить комментарий

Свежий выпуск: за 20 сентября