Коми республика — Россия Федерациялöн регион, пырö федерациялöн Рытыв-Войвыв кытшö. Юркарыс Сыктывкар. Котыртчис 1921 вося август 22 лунö кыдзи комилöн (зыряналöн) автономнöй обласьт. 1936 вося декабр 5 лунсянь Коми АССР. 1991 вося май 24 лунсянь лоис Коми ССР-öн. 1993 вося январ 12 лунсянь Коми республика.
Республикакöд орччаöсь Архангельскса обласьт, кытчö пырö Ненеч автономия кытш, а сiдзжö Тюмень обласьт, кытчö пырöны Ямало-Ненеч да Ханты-Манси автономия кытшъяс, Свердловскса да Кировса обласьтъяс, Перымса край.
Россияса Госкомстатлöн лыдпасъяс серти, 2016 воын олö 856 831 морт. Медся унаыс рочьяс (65,1%), комияс (23,7%), украинечьяс (4,2%), татараяс (1,3%), белорусъяс (1%), немечьяс (0,6%).
Республикаын 12 административнöй район, республикалöн тöдчанлуна 8 да районлöн тöдчанлуна 2 кар, 37 посёлок, 130 сиктсöвет.
Республикалысь конституция примитöма 1994 вося февраль 17 лунö. Законъяс вынсьöдан власьтöн лоö Государственнöй Сöвет, а олöмö пöртан власьтöн — республикаса администрация, код вылын ыджыдыс республикаса юралысь.
Республика вывтасъяса шыльыдiнын: ыджыдджык юкöныс Роч шыльыдiнын, а ичöтджыкыс Урал бердын. Асыв-лунвывсянь рытыввойвылö мунö Тиманса вывтасiн. Сы да Урал костын Большеземельскöй тундра.
Коми республикаын уна мупытшса озырлун: из шом, нефть, газ, сотчысь сланецъяс, асфальтитъяс, титан, бокситъяс, гипс, известняк, минеральнöй ваяс да с. в.
Коми республикаын шöркодь кöдзыд поводдя. Танi бура кузь тöв да дженьыдик гожöм. Ёна зэрö да лымъялö. Шöркодя лымъялö 460 миллиметрысь джуджыдджыка. Тиманлöн рытыввылын 600-öдз да Ураллöн рытыввылын — сюрсöдз. Республикалöн войвылыс — некор сывлытöмин. Кын муыс танi 200 метр судта.
Республикалöн медся ыджыд юясыс Печора, Эжва, Мозын, Вашка, Уса, Изьва, Емва, Сыктыв. Эжва вывсянь Кама вылö петöм могысь лöсьöдлiсны Войвыв Екатерининскöй канал, но дас вит во бöрын россялöм да нюйтöн тырöм вöсна сiйö тупкысис. Тайö канал пырыс республикалысь войвывса юяс кöсйисны бергöдны страналöн лунвылö Волгаö да Каспийö ва содтöм могысь, но ыджыд лёк вайöм вöсна дугöдiсны.
Республикаын 78 сюрсысь унджык ты. Медся ыджыдъясыс Синдор, Кадам, Дон, Ям, Ыджыд Харбей.
Комиын уна нюр. Медся ыджыдъясыс Усинскса, Океан, Дзор, Тыб, Мартюшёвса.
Республикаын кызвыннас лыска вöр. Став вöрыс 29,7 миллион гектар вылын. Асыввывланьджык ёнджык быдмöны ньыв, ниа, сус. Но медся ёна паськалöма коз, кодi быдмö быдлаын.
Комиын пасйöма вöр-валысь 95 видзантор. Медся тöдчанаыс Печора-Ылыдз заповедник да «Югыд ва» национальнöй парк. Маньпупунёр вывтасiнын тöвъясöн да зэръясöн шыльöдöм изъяс лоисны Россиялöн сизим шензьöданторъяс лыдын. Республикаса юралысьлысь могъяс олöмö пöртысь Сергей Гапликов корис республикаса йöзöс гöлöсуйтны сы вöсна, медым тайö изъяссö серпасалiсны Россиялöн 200 шайта выль сьöм вылö.
Комиын унапöлöс звер да пöтка. Медся ыджыд зверъяс лыдын ош, йöра, кöин да сан. Эмöсь сiдзжö руч, тулан, ур, сьöдбöж, кынь да с. в. Ставсö арталöны 4400 пöлöс зверöс. Вöръясын да тундраын 239 пöлöс пöтка. Сiдзжö унапöлöс чери. Сэтшöмъяс, кыдзи стерлядь, белоглазка, краснопёрка, чехонь да судак, Войвыв Екатерининскöй канал пыр локтiсны Кама да Волга вылысь.
Республикаын 2,3 сюрс километр кöрт туй, 4,1 сюрс километр ва туй да 11,8 сюрс километр автомобильöн ветлан туй. Нюжöдны кöсйöны Белкомур (Белое саридз — Коми — Урал, кöрт туй, кодi восьтас Коми республикалы сöвмöм могысь выль позянлунъяс. Сылöн кузьтаыс 1252 километр.
Республикаын уджалöны аэропортъяс Сыктывкарын, Воркутаын, Ухтаын, Печораын, Усинскын, Чилимдiнын, кодъяс пырöны «Комиавиатрансö». Сiдзжö уджалöны ЮТэйр, Нордавиа, РусЛайн, Победа.
Республикаын ыджыд тöдчанлун сетсьö литература да культура сöвмöдöмлы. Медыджыд гижысьяс лыдын Иван Куратов, Виктор Савин, Вениамин Чисталёв, Василий Юхнин, Серафим Попов, Геннадий Юшков. Коми муöс нимöдiсны артистъяс Глафира Сидорова, Иван Аврамов, Михаил Красильников, Юлия Трошева, серпасасьысьяс Рем Ермолин да Станислав Холопов, сьыланкыв тэчысьяс Александр Осипов да Прометей Чисталёв.