1994 вося июнь 6 лунö Коми республикаса Верховнöй Сöветлöн дас кыкöдысь чукöртчöм кызьöд сессия вылын вынсьöдiсны Коми республикалысь государственнöй герб да «Коми республикалöн государственнöй герб йылысь» закон. Россия Федерацияса Геральдикалöн реестрын Комилысь гербсö пасйöма 153-öд номер улын. Коми республикалысь герб серпасалiс художник Анатолий Иосифович Неверов.
«Коми республикалöн государственнöй герб йылысь» законлöн 2 статьяын пасйöма, мый герб серпасалöма перымса звер стильöн: геральдикалöн гöрд пöв вылын зарни варыш, кодлöн морöс вылас аньлöн чужöмбан, сiйöс кытшалö квайт йöра юр.
«Коми республикалöн лэбач» уджын гижысь Виктор Сапрыков пасйö: «Конкурсын вермысь А.Неверов, ассьыс баласö дорйигöн, гöгöрвоöдiс гербсö тадзи: лэбач петкöдлö государство да власьт, кодлöн могöн лоö чужан му да войтырöс дорйöм, сöвмыны отсалöм-ышöдöм, та вöсна лэбач шевкнитöм бордъяса, быттьö кöсйö лэбзьыны. Ён бордъяснас сiйö быттьö шымыртö став республикаöс, видзö лёкторъясысь. Сэкжö шевкнитöм бордъяс тöдчöдöны и лышкыдлун, ёртасьны корöм. Лэбач морöс вылын аньлöн чужöмбан петкöдлö «Зарни аньöс» — олöм сетысь шондi аньöс, мирлысь мамöс, кодi видзö став медся донаторсö да бурсö. Йöра — вынлöн, торъя мичлунлöн пас, а космология серти — мирлöн бур тэчасног — бура видзöдсьö тывборд серпасын, йöралöн мыгöр сетö лэбачлы зумыдлун. Бура бöрйöма и рöмъяс: комияслöн зарни да гöрд рöмъяс лоöны асывлöн, тулыслöн, шондiлöн, мамлöн пасöн. Öнiя ногöн гöрд рöм петкöдлö уджалöм, войтырлысь да власьтлысь водзмöстчöм. Видзöдлыны кö геральдика боксянь, рöмъяссö бöрйöма медся бура: зарни — озырлунлöн, асшöрлунлöн, веськыдлунлöн, бурлунлöн пас. Гöрд рöм лыддьыссьö муслунлöн, повтöмлунлöн, а сiдзжö чужан му вöсна киссьöм вирлöн пасöн. Видзöдлыны кö дзоньнас, шöр зарни мыгöрыс лоас войтырлы бур вöлялöн да вынлöн пасöн».
Водзынджык «Республика» газет, историялöн наукаясса кандидат Ирина Моисеевалöн уджъяс вылö мыджсьöмöн, гижлiс, кыдзи артмис республикалöн герб.
«Öнiя герб лöсьöдöм кузя удж вöлi сьöкыдöн да кузьöн. Герблысь бала дасьтiсны матö нёль во.
1992 воын Коми республикаса Верховнöй Сöвет бердын котыртчис торъя комиссия, кодöн юрнуöдiс Верховнöй Сöветса юралысьöс вежысь В.Потолицын. Комиссия котыртiс медбур герб вылö конкурс.
1993 воын «Молодёжь Севера» газет тöдмöдiс В.Пунеговлöн да В.Сердитовлöн серпасъясöн. Медводдзаыс вöзйис серпасавны герб вылö сюзьöс. Паныд сувтiсны учёнöй-этнографъяс. Комияслöн сюзь — абу вежöрлунлöн, а, мöдарö, мутияслöн пас. Республикаса нöшта öти олысь вöзйис геральдика пöв вöчны зарни-кольквиж рöма сизим сыръя маръямоль дзоридз мыгöрöн. Серпасасьысь В.Сердитов вöзйис герб вылö ошлысь мыгöр. Вöлiны и серамбана вöзйöмъяс. Сiдз, Койгорт районса Грива грездысь Н.Майбуров вöзйис пасьтöдны ош юр вылö шахтёрлысь каска, кöнi пöнар пыдди вит йыла гöрд кодзув».
Комиссиялы ковмис видлавны герблысь сё гöгöр бала. Бöрйыны медбурöс вöлi сьöкыд. Кутшöмöн колö лоны герблы, подулалiсны учёнöйяс. Медся лöсялiс А.Неверовлöн серпас. Но сылöн медводдза балаас вöлi тар. Депутатъяс бöрыньтiсны сiйöс, сы вöсна мый тайö лэбачыс чипан рöдысь. Сэки и чужис мöвп босьтны шöр мыгöрсö перымса звер стильысь.
Аслас выль балаын А.Неверов кöсйис висьтавны Россиялöн да Коми республикалöн öтувъялун йылысь, сы вöсна мый кыкнанныслöн герб вылын серпасалöма лэбачьясöс — кутшöс да варышöс.
1994 вося апрель 20 лунö Коми республикаса Верховнöй Сöветлöн президиум вынсьöдiс А.Неверовöн серпасалöм герблысь бала. Сiйöс донъялiс Россияса президент бердын государственнöй геральдия. 1994 вося июнь 6 лунö вынсьöдiсны «Коми республикаса герб йылысь» Коми республикаса закон.
Коми республикаса национальнöй туйвизьлöн министерство.