*Великополье «Пожöг» овмöдчöмин улын. Танi 65 овмöс, 174 олысь, 47 пенсионер, уджавны вермысь 97 морт. Медся олöмаясыс 86 арöса Анфиса Егоровна Дёмина да 85 арöса Надежда Григорьевна Мингалёва.
*Уна челядя öти семья.
*Кольöм воын эз ворсны ни öти кöлысь, некод эз юксьы. Чужис öти кага.
*Удж абутöм вöсна сиктысь бокö овны мунiсны кыкöн.
*Выль керка кыпöдö сöмын Алексей Степанович Попов. Вайöдiс нин вевт улöдз.
*Клубöн веськöдлö Анна Ивановна Карманова. Сиктын кыпыда пасйöны Микöла лун, волöны весиг орчча сиктъясын да бокиын олысьяс, кодъяс чужлiсны танi.
*Йöзöс бурдöдö медсестра Татьяна Борисовна Дёмина, кодi танi 2005 восянь. Пыр дась петны висьысьяс дорö. Сылы отсасьö санитарка Светлана Васильевна Душевская.
*Школаöдз арлыда квайт челядь, кодъяс ветлöны садйö. Сэнi ставыс 11 челядь, сы вöсна мый видзöны и Улыс Ярашъюса кагаясöс. 2017 воын садсö вуджöдiсны Пожöгдiнса улö, кодöн веськöдлö Анна Ивановна Микушева.
*16 нывка да зонка велöдчöны Ярашъюса школаын. Новлöдлöны найöс автобусöн.
*Шöр туй вöсна кывкутö туй вöчан да дзоньталан Кулöмдiнса участок, сиктса туйяс вöсна — овмöдчöминлöн администрация. Найö кытсюрö жугласьöмаöсь, но дзоньтавны позянлуныс абу.
*Великопольеын олысьяслысь тöжд-могсö видзöдлас улас кутö Пожöг сиктсöветса депутат Татьяна Александровна Игнатова да вайöдö юралысьöдз ли районса кывкутысь йöзöдз.
*Олöмаясöн юрнуöдö Татьяна Александровна Попова. Сiйö кöть олö Ярашъюын, но пыр бур йитöда, дась век отсавны.
*Кольöм воын выльмöдiсны би визьяс, вежлалiсны лампаяс.
*Телефон йитöдöн могмöдö «Ростелеком» Коми филиаллöн Кулöмдiнса юкöн. Эмöсь сiдзжö МТС да Мегафон операторъяс. Но пыр на абу интернет.
*Сёян-юанöн да мукöдторйöн могмöдöны «Иван да Марья» да «Барс» котыръяс. Бöръяыс, кодлöн Пожöгын эм нянь пöжаланiн, могмöдö и няньöн. Сiйöс нöшта вайöны Сыктывкарысь.
*Йöзöс автобусöн Кулöмдiнöдз новлöдлö Александр Михайлович Игнатов, Сыктывкарöдз — Сергей Владимирович Ульныров.
*Сиктын видзöны 82 ыжöс, 7 мöскöс, 5 öшкöс, сы мында жö кöзаöс да öти вöлöс. Видз-му тырмымöн, пуктысьöны ас вынъясöн.
*Сиктын бура тöдöны быдтор вöчны сяммысь Иван Владимирович Шаховöс. Лоис асшöр уджалысьöн, кыпöдö керкаяс вевт улöдз.
*Книгаясöн да газет-журналъясöн могмöдö Ярашъюса библиотека. Сеталö да бöр чукöртö найöс лавкаын. Садса уджалысьяслы лыддьысянторъяссö вайö Пожöгса библиотека.
*2010 воын воссис кусöдчысьяслöн часьт, кодi могмöдö Пожöг вожса сиктъяс. Уджалöны сэнi 12-öн. Эм кык машина. Сиктын öзйöмъяс кусöдан куим ва видзанiн.
*Сикт озыр пыдди пуктана йöзöн. Кулöмдiнса шöр бурдöдчанiнын бур уджöн нималö татысь петöм хирург Александр Михайлович Третьяков. Уджсö бöрйис чожыс вылö видзöдöмöн. Егор Анатольевич Пашнин уна во вöлi хирургöн Сыктывкарса бурдöдчанiнын. Карын жö хирургалö и сылöн пиыс Евгений Егорович Пашнин.
*Пыдди пуктанаяс лыдын и Иван Анатольевич Тарабукин, том артист, кодi олö да уджалö Санкт-Петербургын, петкöдчö киноясын да театрын, снимайтчис «Биа нюр» киноын.
*Газет-журналъясöн могмöдö Пожöгса почта. Вежонын куимысь вайö да разöдö найöс Нина Степановна Попова. Новлöдлö и Пожöгдiнö.
Галина НЕСТЕРОВА.