«Олимпик» дась

[ A+ ] /[ A- ]

Март 25 лунö Кемеровоын лоöмтор вöрзьöдiс сьöлöмсö странаын став олысьлысь: вузасян-шойччан шöринын биын да тшынын сотчис-пöдiс 64 морт, на пиысь 41-ыс — челядь. Öзйöм бöрын «Зимняя вишня» шöринын шойччысьяслы нинöм эз юöртны, йöз эз вермыны веськавны содтöд петанiнъясö сы вöсна, мый сэтчö лэдзысь öдзöсъяс вöлiны томанаöсь. Некымын минутöн ставыс тырис сьöд тшынöн. Висьталöны, мый эз уджав öзйылöм йылысь юöртан сигнализация. Кыдзи шуис президент В.Путин, шöр помкаыс, мый кувсисны та мындаöн — идöртöмлун, веськодьлун. Кодi кывкутiс та вöсна, эз колана ногöн вöч ассьыс уджсö. Веськодь вöлi и та бöрся видзöдысьлы, эз чирышт, эз öлöд.
Мед татшöмторйыс эз ло водзö, кывкутысь йöзлы тшöктiсны выльысь кытшовтны стрöйбаяс, кытчö волöны уна йöз, торйöн нин челядь. Миян районын тайö уджыс мунö жö. Апрель нёльöд лунö районса прокурорöс вежысь Е.А.Попова да биысь видзöм кузя видзöдан да öлöдан юкöнса начальник А.И.Кинаш волiсны «Олимпик» спорт шöринö.
Медводз А.И.Кинаш корис шöринöн веськöдлысь Е.Д.Кузнецовалысь биысь видзчысьöм кузя документъяс да сюся видзöдлiс найöс. «Олимпикын» сувтöдöма öзйылöмъяс йылысь юöртан сигнализация, сiйöс дöзьöритöм могысь кырымалöма та вöсна кывкутысь котыркöд сёрнитчöм. Шöринса директор, сiйöс вежысь да веськöдлысь велöдчисны биысь видзчысян службаöн да гражданаöс видзöмöн веськöдланiнын. Налöн эм право велöдны шöринса уджалысьясöс, кыдзи кутчысьны öзйылöмъяс дырйи да, ковмас кö, петкöдны йöзöс. Велöдчöм йылысь пасйöдъяс гижöны торъя журналö. Кыдзи висьталiс А.И.Кинаш, став документыс эм, мый колö, пасъялöма лючки-бура.
Та бöрын Е.А.Попова да А.И.Кинаш кытшовтiсны дзоньнас стрöйбасö. Видзöдлiсны, кытi öзйылöм дырйи вермасны петкöдны йöзöс, кокниа-ö воссьöны öдзöсъяс, абу-ö найö томанаöсь, кыдзи видзöны öзйылöмысь доръян оборудование. Збыль, «Олимпикöc» вöчöма сiдз, мый челядь да верстьö ковмигöн зэв öдйö вермасны петны ывлаö кöть медводдза, кöть мöд судтаысь. Эмöсь пемыдiнын да тшын пиын югзьысь «Выход» индаланторъяс. Эмöсь ыджыд залысь торъя петан öдзöсъяс, найö абу томанаöсь. Кокниа вермас восьтны весиг кага.
Ставсö кытшовтöм бöрын А.И.Кинаш вöчис татшöм кывкöртöд:
— Позьö кывкутöмöн шуны, мый «Олимпик» дась видзчысьтöм лоöмторъяс кежлö. Друг кö öзъяс, вермасны пыр жö гораа юöртны «Олимпикын» ёнмöдчысьяслы да уджалысьяслы. Биысь доръян оборудование уджалö лючки. Коридоръяс да öдзöсъяс паськыдöсь, öдзöсъяс воссьöны кокниа, та вöсна некод оз йöрмы. Эмöсь кутшöмсюрö посньыдик тырмытöмторъяс, кодъяс йылысь юöртi Е.Д.Кузнецовалы. Чайта, мый сiйö нюжмасьтöг бырöдас найöс. Аттьö Елена Дмитриевналы, мый ассьыс овмöссö кутö бура, кыдзи и урчитöма законöн.
Прокуратура да биысь видзöм кузя видзан да öлöдан юкöн видзöдласны районысь став стрöйбасö, кöнi овлöны челядь.
Лидия ЛИПИНА.
Гижысьлöн снимок вылын: А.И.Кинаш (шуйгавывсянь мöдыс) видзöдалö кусöдчантор.


Комментарии:

Добавить комментарий

Свежий выпуск: за 20 сентября