Нывъяслы колiс чужан кыв вылын петкöдлыны вужвойтырлысь оласног, тöдмöдны аслыспöлöслунöн. Медшöр корöмыс петкöдчысьяс дорö — чужан кыв бура тöдöм да сцена вылын асьсö бура петкöдлыны кужöм. 
Вöлiны Удмуртияысь, Карелияысь, Мордовияысь, Марий-Элысь, Ханты-Манси кытшысь да Комиысь сизим томиник мича ныв. На пиысь öти — Кулöмдiнысь Диана Сенькина, кодлы вермасьöмын сетiсны «Мисс артистичность» ним. 
— Медводзсö ёна полi, но сцена вылö петöм бöрын полöмöй вошис. Меным ордйысьöмыс зэв ёна воис сьöлöм вылö. Нывъяскöд пыр и тöдмасим, ставöн зэв шаньöсь. Казялi, мый удмурт кывлöн комикöд эм уна öткодьлун. Унатор тöдмалi рöдвуж кывъя мукöд войтырлöн оласногысь. 
Вермасьöмыс мунiс сентябр 25-29 лунъясö. Гортын колiс дасьтны вужвойтырлöн оласног йылысь видео. Сiдзжö петкöдлiм, кыдзи кужам мичаа ветлыны национальнöй паськöмöн вöччöмöн, висьталiм асланым мифологияса радейтана герой йылысь, сэсся вочавидзим донъялысьяслöн юалöмъяс вылö, тöдмöдiм йöзкостса ворсöмъясöн, петкöдлiм сямлун, ветлöдлiм мича платтьöясöн, асланым войтырлы лöсялан мичаторйöн. Ме сьылi коми кыв вылын сьыланкыв да тöдмöдi «Дзимилюки» тешöн. 
Ме вöсна ёна «висисны» рöдвуж, ёртъяс, академияын öтлаын велöдчысьяс, велöдысьяс, ректор. Тайö меным ёна отсалiс. Конкурсын урчитöма, мый мöд во ордйысьöмыс мунö вермысьлöн чужанiнас. Таво вермис Марий-Элысь Светлана Давыдова. Сылöн вöлiны зэв бур костюмъяс да реквизитъяс. Тыдалiс, мый ёна дасьтысьöма. 
Медся ёна меным воис сьöлöм вылö финаллöн руыс, ми нывъяскöд ёна ёртасим. Аддзим матыссаяслысь миян вöсна «висьöмсö», и тайö сетiс вын, окота вöлi петкöдчыны бура, — юксис мöвпъясöн Диана. 
Писькöс, нюмъялысь нывка велöдчö мöдöд курсын госслужбалöн академияын зарубежнöй регионоведение факультет вылын. Велöдöны суйöрсайса оласног. Велöдчигöн ветлöмаöсь Венгрияö. 
Дианалы 19 арöс. Гожöмнас сiйö пыравлiс уджавны культура керкаö: ворсöдiс да гажöдiс челядьöс, петкöдлiс мойдъяс да сьылiс концертъяс вылын. Культура керкаын сiйöс ставöн тöдöны да пыдди пуктöны: дзолядырсянь нин ныв сьылiс да йöктiс «Фантазия» котырын, тшöкыда петкöдчылiс «Эжваса дзоридзьяскöд» нималана «Василей» гаж вылын. Уна кад сиис и спортлы, сылöн ГТО кузя зарни пас. Велöдчигöн нывка оз дугöдчы сьылöмысь, «Студентъяслöн тулыс» конкурсын лоис коймöдöн. Ветлöдлö сiдзжö йöктыны да волейбол вылö. 
Галина КЛЮЖЕВА. 
Снимок Наталья РУЗНЯЕВАЛÖН.