Йöршитöм 41 мортлы 16 жыр лöсялö став корöмлы. Эмöсь мыссянiнъяс, могмöдам вольпась кöлуйöн, вердам куимысь лун. Пуктöма 54 видеокамера. Миян веськöдлысьяслы, весиг пытшкöсса делöяс министерствоын уджалысьяслы, тыдалö быд воськов, кыдзи ми уджалам, кыдзи видзам йöршитöмъясöс, — висьталiс районын пытшкöсса делöяс юкöнын кад кежлö йöршитанiнса начальник Сергей Александрович Губер, кодi уджалö 1995 вося сентябрсянь. Лöнь öлöм вöсна медводз тöждысис патрульно-постöвöй службаса котырын, сэсся уджалiс дежуритан юкöнын. 2012 восянь зiльö кад кежлö йöршитанiнын, тавося ноябрын пуктiсны начальникöн. Сылöн уджалан котырын 16-öнöсь. Кык понкöд пыр уджалö да велöдö кинолог. Эм торъя котыр, кодi мыжаясöс нуö-вайö судъяс вылö, Сыктывкарса йöршитанiнö. 
Татчö веськалöны быдсяма мыж вöчысьяс, тшöкыда «шойччöны» и юысь-кодалысьяс. Бöръяясыс локтöны быттьö гортаныс, пырöмöн шуöны: «Видза оланныд, Сергей Александрович! Бара на веськалi тiян дорö. Вердöй, мыссьöдöй». 
Гижöд да снимок Марина ДАДАШОВАЛÖН.