2022-öд вося ноябрсянь Лопъювадын уджалö сьöмöн могмöдан торъя программа серти кыпöдöм модуля ломтысянiн. Öнiя кадся, пытшкöсас кыпыд, сöстöм, югыд. Шоныд воö школаö, садйö, фельдшерско-акушерскöй пунктö, клубö, почталöн юкöнö, лавкаö.

— Ломтысянiнсö вайисны Барнаулсянь, сiйö вöлi дась нин, колiс сöмын тэчны. Медводз дасьтiм плитаясысь подув, а тшын петан кузь трубаыслы вöчим торйöн, кодйим кык метра да кисьтiм цемент. Вайысьясыс и кыпöдiсны, а сэсся йитiсны шоныд мунан трубасö. Велöдiсны уджавны оборудованиесö лöсьöдiгмоз, видзöдiсны выль ломтысянiнлысь уджалöмсö, а сэсся мунiсны. Колiгöн накöд йитчылi телефон пыр, — сёрнитiс мастер Геогрий Викторович Онищук.

 Айлов «Шоныд сетан Коми компания» акционер котырын матö нёль во. Уджыштiс на важ ломтысянiнас. Выльсö вайтöдз медводз кöнi колö вежисны шоныд мунан визь, дасьтысисны водзвыв. Öнiя трубаясыс шоныд кутöдаöсь, да керкаясö мунiгöн шоныдыс оз вош. Ломтысянiнысь петiгöн кö вöлi 65, то, шуам, школаö пыран трубаын 62 градус шоныд, и тайö зэв бур. Уджаланiнын экран вылын тыдалö ставыс: пöртлöн, насосъяслöн уджалöм, давление, пöртйын да пöртйысь петiгöн температура да с.в. Кык пöрт, тöвнас кöдзыд лунъясö уджöдöны кыкнансö. Колö пасйыны, мый важ ломтысянiныс видзасын, пыр на дась уджавны.

 Георгий Викторович локтöмöн выльмöдiсны и ва мунан визь, дзоньталiсны скважина да выльмöдiсны сэтчö воысь би визь. Посёлокын быд улича вылын колонка, ставнас öкмыс ва босьтанiн. Пытшкас сулалöны бисянь уджалан шонтанъяс. Торъя морт кывкутö ва вöсна, жуглö-весалö йизьöминъяс, мед олысьяс вермисны матыстчыны да босьтны ва. Ёна отсасьö посёлокса асшöр уджалысь Сергей Викторович Мастюгин, могмöдiс тьöс-плакаöн, да уджалысьяс эжисны ва колонкаяс, сэсся мавтiсны найöс. Сергей Викторович жö ломтысянiнсö могмöдö пескöн. Бара жö торъя морт пилитö, поткöдлö гырысь чуркаяссö.

 Талун уджалан котырын нöшта нёль ломтысьысь. Ставныс ыджыд сямаöсь. Шоныд сетöм дугöдöмöн кутасны дасьтысьны локтан тöв кежлö. Саысь весаласны тшын мунанiн, вентилятор. Кöнкö да мавтасны, мыськаласны, видзöдласны-донъяласны и оборудованиелысь уджалöмсö. Урчитiсны дзоньтавны мöд ва скважинасö. Ставсö вöчасны отпускö петтöдз.

 Марина Дадашова.

 Снимок Георгий Онищуклöн.