Тöрöдчим ставöн

 2012-öд во. Звöнитö овмöдчöминса администрацияöн веськöдлысьöс вежысь Николай Васильевич Игнатов. Локтöны пö Кырнышаö «Парма гор» газетлöн редакцияса уджалысьяс, да колö дасьтысьны-виччысьны. Сэсся сiйö, ме да Михаил Васильевич Курочкин мöвпалiм, кöнi да кыдзи вочаавны юрсиктса гöсьтъясöс. Клуб абу, да Николай Васильевич вöзйис, гашкö, пö тiянö чукöртчылам. Ме эг бöрыньт. Нöшта пö гажöдны локтöны и Евгений пиыскöд Александр Егорович Уляшев да Елизавета Фёдоровна Хозяинова.

 Воис кад. Сьылысьясыд вайисны ассьыныс шылад ворсанторъяссö. Кытчö нö, мися та мындасö тöрöда. Прöстмöдi öти жыр, мед тöрисны и йöз.

 Поводдя вöлi мича. Грездсаяслы збыльвывса праздник кодь, öд оз быд лун та мында гöсьтыд овлы.

 Сэки волiсны редакцияын öнiя уджалысьяс Марина Юрьевна Дадашова да Галина Ивановна Нестерова. Шопернас вöлi Пётр Магометович Гилев, öнi олöмаяслöн Носимса котырöн веськöдлысь. Унаöн абу нин ловъяöсь. Николай Александрович Лютоев йöзкöд сёрнитöм бöрын быдногыс миянöс снимайталiс, быттьö пö туй кузяыс мунанныд. Корреспондентъяс ветлöдлiсны-уджалiсны лунтыр, пажнайтiсны миянын. Сэсся гижысьяс аддзысьлiсны грездса олысьяскöд. Сэки медшöр редактор Василий Григорьевич Лодыгин тöдмöдiс газетлöн тöжд-могъясöн, вочавидзис юалöмъяс вылö, лыддис ассьыс кывбуръяс. Сы бöрын ворсiс «Юрган» котыр.

 Унаöн бырисны и грездса олöма йöз пиысь. Гудöкасьысь Александр Акимович Горшенев, кык чой Мария да Анна Александровна Мингалёваяс, меддыр олысь гозъяысь Пантелеймон Александрович Курочкин, Елизавета Ивановна гöтырыс Ухтаын Нина ныв ордас.

 Сэки Лилия Чисталёва да Валерия Ракина вöлiны дзоляöсь на, а öнi невестаяс нин. Бура помалiсны школа. Лилия вуджис овны Изьва районса Кыдзкарö, а Валерия — Скöрöдумö. Кыкнанныс велöдчöны вузын, öтиыс Сыктывкарын, мöдыс Ухтаын.

 Ме ачым важынсянь нин ёртася «Парма гор» газеткöд. Медводдзаысьсö гижлi 1999-öд воын. Буретш сiйö воын газетлöн вöлi тшупöда паса во. Письмöяс юкöнöн веськöдлысь Нина Ивановна Буткинасянь воис письмö, корис газетöс 70 воöн нимöдан гаж вы-лö. Сэки районса юралысь С.П. Каплин газетö йöзöдчöмысь менö пасйис почёт грамотаöн.

 Мария Дёмина.

 Снимок Николай Лютоевлöн.