Муса чужан кыв

[ A+ ] /[ A- ]

Февраль 21-öд лунö пасйисны чужан кывлысь ставмирса лун. Такöд йитöдын велöдан управлениеысь том йöзкöд уджалан юкöнса эксперт О.И.Чувьюрова нуöдiс «Чужан кыв» ворсöм. Вöлi Кулöмдiнса да Ручса школаясысь велöдчысьяслöн да том йöзлöн вит чукöр.
Ворсiсны Кулöмдiнса школаын. Сёрнитiсны комиöн. Вöчны колiс унатор: петкöдлыны мойд, видзöдны мультик да сы серти гижны 10 коми кыв, тöдмавны гижысьяслысь нимъяс, юржугланторйысь аддзыны коми кывъяс, важся коми анбур серти тöдмавны кывбур, шылада уна инструмент пиысь бöрйыны сöмын комияслысь, тэчны кык юкöнысь кыв.
Ворсiсны кыпыда, сьöкыдджык вöлi сöмын Кулöмдiнса велöдчысьяслы, кодъяс омöля тöдöны коми кыв. Тадзи пасйисны ворсöм нуöдысьяс. Ручса челядьлöн висьталöм серти, медся кокни вöлi тöдмавны коми гижысьяслысь нимъяс. Зэв бур, мый сиктас бура велöдöны коми кыв.
Вермис Кулöмдiнысь «Оз тусьяс да тшак» котыр, мöдöн лоисны Ручса «Шöвктугъяс» да коймöдöн «Кулöмдiнса зонъяс».
Чайта, мый татшöм ворсöмъясыс зэв коланаöсь, сы вöсна мый бöръя кадö коми кыв кылö омöля. Буретш ворсöм пыр позьö чужтыны челядьлысь чужан кыв дорö муслун.
Гижöд да снимок Галина КЛЮЖЕВАЛÖН.
Снимок вылын: мöдöн лоысь Ручса челядь.


Комментарии:

Добавить комментарий

Свежий выпуск: за 20 сентября