Шань да восьса Татьяна Александровна Игнатовалöн нёль челядь. Денис велöдчö педколледжын, лоас содтöд тöдöмлунъяс сетысьöн. Бура вöчасьö сюмöдысь, регыд на ветлiс Ухтаö да Чечняö да лоис медводдзаöн, петкöдлiс сюмöдысь вöчöм конструктор. Софья велöдчö 6-öд классын, бура жö вöчасьö сюмöдысь да радейтö футбол. Медся посни öтпырйö чужöм Дариналы да Данииллы 8 арöс. Дарина пыр клеитчö, вундасьö, мöвпыштö вöрсöмъяс, Даниил босьтчылö унаторйö, но öдйö эновтчö. Öнi кöсйö лоны массажистöн. 
Татьяна Евгений Алексеевич верöсыскöд ыджыд котырöн ставсö вöчöны öтвылысь. Окотапырысь петкöдчöны вермасьöмъясын, радейтöны öтув ветлыны гажъяс вылö, петавны сиктö. Тöлын кöть гожöмын. Гожöмнас тшöкыда петалöны вöр-ваö, кыйöны чери, ворсöны Татьянаöн мöвпыштöмторъяс. Сiдзжö отсалö верöсыслы вöчасьны сюмöдысь, ставсö жö кужö. 
Татьяна Пожöгысь. Тöдмасьлiс верöсыскöд школа помалöм бöрын. Челядьлöн чужöм бöрын гортсяньыс велöдчис бухгалтерö. Öнi сиктса администрацияын специалист, чукöртö йöзлысь документъяс. Кужö кысьыны, водзтi печкис. Пусьö-пöжасьö да велöдö Софьяöс. Вöчö аслыспöлöс козинъяс, а оз ньöб лавкаысь. 
Дзолядырйиыс ёна кöсйис лоны инженерöн, мед мыйкö разьны да тэчны. Быдмис зэв вильышöн. Батьыс пыр шулiс, мый сылы колiс чужны зонкаöн. Асьсö да Денисöс шуö хакерöн: ёна вöдитчöны компьютерöн, Татьяна вöчалö фотояс, весиг дзоньталö телефонъяс. 
— Ме челядьöс ог чиршöдлы. Найö зэв шаньöсь да сибыдöсь. Челядьтö колö ёна радейтны, мед найö кылiсны тайö сьöлöмнаныс да пыр тöдiсны, мый найöс виччысьöны гортаныс. Локтöны да сьöлöмсяньныс висьталöны, кыдзи колис лун, и ме найöс сюся кывза, — висьталiс Т.А.Игнатова. 
Татьяна абу сöмын шань мам да гöтыр, но и сиктсöветса депутат. 
Галина КЛЮЖЕВА. 
Евгений ИГНАТОВЛÖН 
снимок вылын: Игнатовъяс.