Коми республикаын

[ A+ ] /[ A- ]

ФРОНТÒВИКЪЯСЛЫ СЬÒМ

Коми республикалы воис сьöм, медым сетны фронтöвикъяслы. Федерациялöн бюджетысь торйöдìсны 87 миллион 552 сюрс шайт, кодöс сетасны оланìн бурмöдысь либö керка кыпöдысь войнавывса ветеранъяслы. Найöс пыртöма социальнöя сöвмöдан агентстволöн списокö. Сэнì 83 ветеран, на пиысь 76-öн виччысьöны федерациялысь сьöм. Сìйöс ветеранъяслöн тшöт вылö мöдöдасны матысса кадö.

Тöдвылö: оланìн ньöбöм либö кыпöдöм вылö öтчыдысь вичмöдан сьöм сетсьö Великöй Отечественнöй войнаса инвалидъяслы, Великöй Отечественнöй война вылын вöлысьяслы, «Ленинградса кытшын олысьлы» паса йöзлы, Великöй Отечественнöй войнавывса инвалидъяслöн да Великöй Отечественнöй война вылын вöлысьяслöн семьяясö пырысьяслы, а сìдзжö налы, кодъяс Великöй Отечественнöй война дырйи уджалìсны фронт дорын сынöд доръян объектъяс вылын, стрöитìсны дорйысянторъяс да мукöд объектъяс. Òтчыдысь сетан сьöмыс 1 миллион 152 сюрс шайт.

СЕТНЫ ОТСÒГ

Коми республикаын сьöкыда воан сиктъясö да посёлокъясö тöваръяс вайöм йылысь сёрни бара кыпавлìс экономическöй сöветлöн чукöртчылìгöн.

Кыдзи юöртìс Кулöмдìн районса юралысь Д.А.Шатохин, администрация да предпринимательяс некымынысь нин шыöдчылìсны экономическöя сöвмöм кузя министерствоö сьöкыда воан сиктъясö да посёлокъясö тöваръяс вайöм да сэтысь прöдукция нуöм йылысь сёрниöн. Вайöм кузя кö гöрöдсö разьöма да предпринимательяслы вештöны рöскодлысь юкöн, да та дырйи, Д.А.Шатохинлöн кывъяс серти, лöсьöдсьöны экономика сöвмöдöм могысь бур условиеяс Вöлöгдалы да Кировлы, то ньöти эз кокньöдыштны предпринимательясöс, кодъяс котыртöны татшöм сиктъясын да посёлокъясын прöдукция вöчöм. «Талун районса некымын предприниматель та вöсна кöсйöны вуджöдны ассьыныс производствосö мöд местаö, кытчö позьö веськавны падмöгъястöг», — тöдчöдìс Д.А.Шатохин.

Республикаса юралысь В.М.Гайзер пасйис, мый тайö сёрниыс кыпалö оз нин медводдзаысь. «Сы вöсна, мый та кузя некутшöм воськов водзö абу, то вöча кывкöртöд, мый экономическöя сöвмöм кузя министерство эз пöрт олöмö менсьым индöд, — шуис республикаса юралысь. — Миянлы быть колö отсавны прöдукция вöчысь предпринимательяслы да тайö отсöгсö сюйны бюджетö. Ме думысь, депутатъяс мунасны воча. Ме кора мыждыны кывкутысь став йöзöс, кодъяс эз пöртны олöмö республикаса юралысьлысь индöд», — кывкöртìс В.М.Гайзер.

Комиинформ.

Комментарии:

Комментарии запрещены.

Свежий выпуск: за 13 февраля