Любовь Александровна Кочанова Сыктывкарса государственнöй университет помалöм бöрын локтiс уджавны Кулöмдiнса шöр школаö и со 28 во нин сетö танi коми кыв да литература кузя урокъяс. Тайö кадöн шедöдiс велöдан уджын ыджыд сям, шань сьöлöмнас кокниа сибöдчö челядь дорö. Сöмын майшöдлö сiйö, мый бырисны коми классъяс, такöд и чужан кыв пыдiсянь велöдöм. Öнi роч классъясын комисö велöдöны, кыдз государственнöй кыв.

Талун школалöн тöдчана мог — федерацияса выль стандартъяс пыртöм. Ичöт классъяс тырвыйö нин велöдчöны выль программа серти, вочасöн сiйöс пыртöны и шöр юкöнö. Таво кутасны велöдны 5-7 классъяс. Выль ног уджавны пырöдчытöдз Любовь Александровна велöдчис Сыктывкарын курсъяс вылын, стажируйтчис Коми национальнöй гимназияын, босьтöм тöдöмлунъяссö тырвыйö пыртас уджö.
Любовь Александровналöн быдтасъясыс тшöкыда петкöдчылöны олимпиадаясын да дзирдыштлöны бур тöдöмлунъясöн, а Елизавета Наумова кольöм воын республика тшупöдын шедöдiс ичöт Нобелевскöй премия. Велöдысьлы челядьлöн вермöмъясысь, дерт, зэв нимкодь.
Гижöд да снимок Галина Нестеровалöн.