Тöдмасигöн Людмила вöлi зэв на томöн, Александр сöмын на локтiс армияысь. Колльöдiс мича нылöс гоз-мöд рыт да мусмисны öта-мöдныслы. Гижсисны 1995 воын, сiйö жö вонас ноябрын чужис Наташа. Вайис зэв сьöкыда да бурдöдысьяс водзö вайöмысь öлöдiсны, а верöсыслы ёна колiс пи да босьтiсны приютысь. Натальялы öнi 23 арöс, быдтысьö, Варвараыслы вит тöлысь. Олö Сыктывкарын, но гожöм кежлö локтöма бать-мам ордас. Приютысь босьтöм Германлы 24, Виолетталы та мында жö, Пётрлы 18 да Кристиналы 12 арöс. Герман öнi служитö Мурманскын, ветлiс нин кыкысь Сирияö. Виолетталöн аслас нин семья, быдтöны Мелиссаöс, олöны Керчомъяын. Пётр öкмысöд класс бöрын мунiс велöдчыны Сыктывкарса мöдöд номера педколледжö физкультура велöдысь вылö. Кристина помалiс нёльöд класс. Став челядьыс, мамлöн кывъяс серти, зэв шаньöсь да век отсасьöны волiгöн. Пыдди пуктöны öта-мöднысö, ёртасьöны. 
Людмила Пантелеймоновна дас воысь дырджык уджалö лавкаын. Александр тöвъяснас ветлывлö уджавны бокö, манипуляторвывса операторöс корöны быдлаö. Гожöмнас гортын, удж юрвывтыр: эм град йöр, видзöны мöскöс, ялавичöс да öшкöс. Уна кад сиö челядьлы, велöдö ветлыны трактор вылын. Кужö нин весиг медся дзоляыс. Вичман кадö петавлöны вöр-ваö, Людмила сьылö «Весна» котырын. 
— Сиктад овны лöсьыд. Ас йöв да яй, сöстöм сынöд. Ми верöскöд тась некытчö ог мунöй. Радейтам да пыдди пуктам öта-мöднымöс. Эг весиг казялöй, а кольöма нин 23 во! Öнiя том йöзöс кора видзны öта-мöднысö да радейтны, — висьталiс Людмила. 
Гижöд да снимок 
Галина Клюжевалöн.