Удж оз быр 

[ A+ ] /[ A- ]

Июнь 22-öд лунö чукöртчылiс «Коми войтыр» öтмунöмлöн районса представительство. Сёрнитанторйöн лоис «Вöльдiн», «Дiасёръя», «Пожöг», «Помöсдiн» овмöдчöминъясса олысьяслöн представительство дорö шыöдчöм, кöнi корöны отсöг. «Монди СЛПК» котырса вöр заптан службалöн Асыввыв юкöнысь Вылыс Эжваса участокын уджалысьясöс майшöдлö, мый Помöсдiнысь Кебанъёльö кöсйöны вуджöдны юкöнлысь администрация да техника дзоньталанiнъяс, мый лёк боксянь тöдчас овмöдчöминъясын олысьяслы: «Мондиын» уджалысьяс пиысь уналы ковмас эновтчыны сыысь, сы вöсна мый оз быдöн вермы ли оз окотит вуджны сэтчö. Помöсдiнсянь Кебанъёльöдз матö 75 километра, быд лун öтарö-мöдарö туй вылö кутас вошны матö 3-4 час. Уналöн челядьныс ветлöны садйö, и бать-мам оз удитны найöс нуны ни босьтны. Ветлыны ковмас либö ас машинаöн, либö рейса автобусöн (а сiйö бöрсö юрсиктысь вöрзьöдчö час лунын). «Монди» йöзöс нуны-вайны транспорт оз сет. Администрация да гараж вуджöдöм бöрын, вермас лоны, «Монди» вочасöн дугöдчас уджавны Помöсдiн вожын. Том йöз дугдасны кольччыны сиктö. Шыöдчысьяслöн кывъяс серти, «Монди» кöсйö чинтыны воштöмъяс, та вöсна и вöчö тадзи. Комбинат — ыджыд социальнöй кывкутана котыр, но артмö, мый некодкöд лыддьысьны оз кöсйы, уджалысьяслысь эз юась. Шыöдчöмсö мöдöдiсны республикаса юралысь С.Гапликовлы, Госсöветöн юрнуöдысь Н.Дорофеевалы, вöр юкöнса профсоюзлöн котырлы, районса администрацияöн веськöдлысь С.Рубанлы, «Коми войтыр» öтмунöмлöн районса представительстволы, «Монди СЛПК» котырса генеральнöй директор К.Пеллерлы. 
Кыв шутöг, майшöгыс ыджыд, öд талун Вылыс Эжваса юкöнын уджалö матö 160 морт, кызвыныс — индöм овмöдчöминъясса олысьяс. Тайö лыдпассö колö содтыны некымын пöв, öд быд уджалысьлöн — семья, челядь, бать-мам. 

Представительствоö пырысьясысь öтдор волiсны райадминистрацияöн веськöдлысьöс вежысь В.Бадьин, районса юралысь А.Кондрашкин, юкöнъясöн веськöдлысьяс, «Вöльдiн» да «Помöсдiн» овмöдчöминъясса юралысьяс. «Мондиöс» петкöдлiсны вöрöн могмöдöм кузя директор А.Бендер, вöр заптан службаса Асыввыв юкöнöн веськöдлысь К.Ипатов. 
А.Бендер гöгöрвоöдiс, мый збыльвылас кöсйö вöчны «Монди». Сы серти, абу гöгöрвоана, мыйла гижысьяс медводз шыöдчисны эз котырöн веськöдлысьяс, а веськыда республикаса юралысь дорö и мыйла тайö юалöмыс лэптiс сэтшöм ыджыд гы. «Монди» ньöбис Кебанъёльысь туй керка да сэтчö кöсйö вуджöдны (öтувтны) Помöсдiнысь, Югыдъягысь, Зимстанысь, Кöрткерöсысь да Сыктывкарысь юкöнъясöн веськöдлысьясöс. Техника дзоньталананiнъяс вуджöдöм йылысь некутшöм сёрни оз мун, кыдзи заптiсны вöр Помöсдiн вожын, сiдзи кутасны заптыны и водзö, став техника лоас сэнi. Мöд-кö, оз чинтыны ни öти мортöс, сöмын öтилаö чукöртасны став веськöдлысьöс. Буретш тадзи во кык сайын вöчисны Койгорт районын, кор Визинысь веськöдлан котыр вуджöдiсны Койгортö. Оз чин вöр заптöм, сiдзкö, кольöны и вöрын уджаланiнъяс. А.Бендер серти, найö дасьöсь сёрнитны йöзкöд восьсöн. Дерт, оз быдöнлы татшöмторйыс во сьöлöм вылас, но тайö нин котырлöн аслас пытшкöсса делöяс. К.Ипатов сiдзжö эскöдiс, мый став уджаланiныс кольö, сöмын йöзöс, 18 мортöс, вуджöдасны Кебанъёльö. Письмöсö дасьтöма да гижöма весиг туй керка ньöбöмысь да мыйкö урчитöмысь водзджык. Талун кежлö ни öти морт эз шу, мый оз вудж да оз кут водзö уджавны «Мондиын». Абу на нинöм урчитöма и йöзöс нуöм-вайöм кузя, кутасны сёрнитны водзö. Аксель Бендер дась гижöмöн нöшта öтчыд эскöдны, мый Помöсдiн вожын удж оз сувт, йöзöс оз чинтыны, вöр заптöм мунас сэтшöм жö öдъясöн, кыдзи и талун. 

Сёрнитiсны сiдзжö Зимстанын пöдрада котырлöн удж йылысь. Кыдзи гижлiс «Парма гор» газет, таво тулыснас «Монди» дугдiс уджавны «Технолес» да «НефтеГазЭнергоСтрой» вöр заптысь пöдрада котыръяскöд. Некымын во сайын найö босьтчылiсны бура, ёна отсасисны посёлоклы, дöзьöритiсны туйяс. Но бöръя во кыксö йöз кутiсны элясьны, мый лёка сеталöны удждон, а кодсюрööс вöтлiсны удж вылысь. Сэкжö «Монди» тырвыйö вештысьлiс пöдрада котыръяслы сёрнитчöмъяс серти. /нi Зимстанын босьтчис уджавны «Лессервис» пöдрада котыр. «Коми войтыр» öтмунöмлöн представительствоö пырысь Н.Русинова висьталiс: йöз элясьöны, мый воддза котыр эз на тырвыйö вешты став удждон, кодсюрööс век на эз мездыны удж вылысь да найö «öшйисны». Гашкö, «Мондилы» чорыдджык видзöдлас улын кутны пöдрада котыръяслысь удж? А.Бендер вочавидзис, мый комбинат оз сюйсьы пöдрада котырлöн уджö, «Монди» оз кывкут сылöн пытшкöсса удж вöсна, но дась сетны йöзлы юридическöй отсöг, висьтавны, мый вöчны водзö. Лоас медся бур, йöз кö ассьыныс правояс дорйöм могысь шыöдчасны судö. 
«Лессервислы» «Монди» урчитö во чöжöн заптыны 370-390 сюрс кубометр вöр, сiйö кутас выльмöдны техника. Талун вöрын уджалö вит комплекс. Йöз уджалöны вахтаöн. 

Н.Русинова корис, медым выль пöдрада котыр пасйысис районын (тайö ваяс районса сьöм кудйö содтöд вот) да кырымалiс районса администрациякöд социальнöй ёртасьöм йылысь сёрнитчöм. А.Бендер вочавидзис, мый тайö районлöн «пытшкöсса» делöяс, комбинат та вöсна оз кывкут, районса администрациялы аслыс ковмас сёрнитны «Лессервискöд». 

Помöсдiн — Пожöг вожса олысьяслысь шызьöмсö позьö гöгöрвоны: унаысь вöвлi, мый котыр медводз «чинтысьлiс», а сэсся тупкысьлiс дзикöдз. Талун мондисаяслöн бур удждон, эм позянлун ёнмöдны дзоньвидзалун, ветлыны шойччыны санаторийясö, сiдзкö, ясыд аскиа лун. Тайöс воштыны некод оз кöсйы. Кыдзи эскöдiс А.Бендер, майшасьны талун нинöмла, удж некодлöн оз быр.

Лидия Липина.


Комментарии:

Добавить комментарий

Свежий выпуск: за 19 июля