Петкöдчис вит школаысь квайт велöдысь: томъяс пиысь Кулöмдiнысь А.Ф.Бурак, Помöсдiнысь А.М.Игнатова, Лопъювадысь С.Я.Райнгардт, дыр уджалысьяс пиысь Кулöмдiнысь О.М.Сковородникова, Югыдъягысь И.Н.Булышева да Дiасёръяысь А.А.Курочкина. Висьталiсны ас йывсьыныс, нуöдiсны восьса урок, юксисны сямöн.
Ас йылысь висьталöм медвылö донъялiсны Югыдъягысь биология велöдысь Ирина Николаевна Булышевалысь, кодi водзмöстчö и посёлокса олöмын, ёртасьö спорткöд, вевъялö быдлаö. Восьса урокъяс медбура нуöдiсны Кулöмдiнса шöр школаысь роч кыв да литература велöдысь Алёна Фёдоровна Бурак да англия кыв велöдысь Ольга Михайловна Сковородникова. Асланыс сямöн медбура юксисны да велöдiсны мукöдъясöс Дiасёръяысь история да обществознание велöдысь Александра Алексеевна Курочкина да Югыдъягысь Ирина Николаевна Булышева. Бöръяыс петкöдлiс, кыдзи нуöдны электроннöй журнал да баллъяс отсöгöн пуктавны оценкаяс. Тайö колiс ставлы, сы вöсна мый тайö выльторсö сöмын на пыртöны. Помöсдiнысь математика да физика велöдысь Анастасия Михайловна Игнатова дасьтiс медбур сайт, кытысь коланасö позьö босьтны бать-мамлы, челядьлы да велöдысьяслы. Таво конкурсын выльторйöн вöлi сiйö, мый велöдысьяс содтöд вочавидзисны юалöмъяс вылö. Медбур тöдöмлунъяс петкöдлiсны Лопъювадысь ичöт классъяс велöдысь Светлана Яковлевна Райнгардт да Александра Алексеевна Курочкина.
Ставсö донъялöм бöрын конкурсын вермысьöн лоисны Кулöмдiнысь А.Ф.Бурак да О.М.Сковородникова, «Велöдан сям восьтöм» юкöнын — Лопъювадысь С.Я.Райнгардт. Налы вичмисны велöдан управлениелöн дипломъяс, мукöдыслы аттьöалан гижöдъяс.
— И мöвпыштны эг куж, мый ас котырын лоа медбурöн. Дерт, дасьтыси ёна, медым петкöдчыны бура. Зэв нимкодь, мый верми, — висьталiс О.М.Сковородникова, кодi велöдö челядьöс 12 во. Тшöкыда петкöдчылö конкурсъясын интернет пыр, ышöдö таö и челядьöс. Найö сюртчöны и олимпиадаясö, кöнi петкöдлöны зумыд тöдöмлунъяс.
— Зэв нимкодь, мый тайö конкурсын велöдысьяс воысь воö петкöдчöны пыр бурджык тöдöмлунъясöн. Таво весиг сьöкыд вöлi бöрйыны медбурсö. Ставныс зэв водзмöстчысьöсь, öдйö пырöдчисны государстволöн выль программаö, буретш сы серти нуöдiсны урокъяс да петкöдлiсны ыджыд сям, — кывкöртiс велöдан управлениеысь районса методика кабинетöн веськöдлысь М.А. Бикбулатова.
— Татшöм конкурссö колö нуöдны и водзö, öд сiйö отсалö велöдысьяслы донъявны ассьыныс кужöмлуннысö да сямнысö, воськовтны гырысьджык вермöмъяслань , — содтiс районса администрацияöн веськöдлысьöс вежысь Н.А.Левченко.
Галина НЕСТЕРОВА.
Гижысьлöн снимок вылын: О.М.Сковородникова да А.Ф.Бурак.