Ыдждöдлiсны олöма аньясöс

[ A+ ] /[ A- ]

Помöсдiнысь Мария Николаевна Игнатова февраль мöдöд лунö пасйис 90 арöс тырöм. Шензьö, кутшöм öдйö лэбис кад: быттьö öнi на котралiс школаö, уджалiс быдтысигмоз, а ставыс нин колис бöрö. Но, та вылö видзöдтöг, зэв на кыпыд лола да том сьöлöма.
Чужис Помöсдiн дорса Мöдлапöлын. 1945 воын помалiс шöр школа. Уджалiс загсын, но Помöсдiн район бырöдöм вöсна юкöнсö вуджöдiсны Кулöмдiнö. Пырис почта вылö да газет-журналъяс да письмöяс мöдöдан да разöдан юкöнын уджалiс пенсияöдз. Дыр да кывкутöмöн уджалöмысь вичмöдiсны «Знак Почёта» орден, «Уджвывса ветеран» да юбилейнöй медальяс, «Коммунистическöй уджвывса ударник», «Социалистическöй ордйысьöмын вермысь» пасъяс да почёт грамотаяс.
Быдтiс-велöдiс да петкöдiс асшöр олöмö кык челядьöс. Öнi олö Василий пиыскöд, кодi видзö сiйöс, бергöдö гортгöгöрса удж. Нимкодясянторъясыс — кык внучка да налöн нин челядь. Волöны да гажöдöны кыпыд дзользьöмнаныс.
Чужан лунö тшупöда пасöн Мария Николаевнаöс чолöмавны волiсны районса администрацияöн веськöдлысьöс вежысь Н.А.Чаланова, кодi вичмöдiс президент В.В.Путинсянь чолöмалан гижöд да козин, а сiдзжö олöмаяслöн районса котырöн веськöдлысьöс вежысь И.З.Ахмадова, Помöсдiнса юралысь А.Е.Уляшев, почтаса уджалысьяс да став рöдвуж. Сиисны ён дзоньвидзалун, кыпыд лов да дыр на овны.

Скöрöдумын чужöм Клавдия Константиновна Дёмина олiс сьöкыда. Муртса помалiс нёль класс, пырис уджавны садйö. Тайö вöлi 1942 воын. 16 арöсöн мöдöдiсны кöръяс дорö. 1943 воын Скöрöдумса «Дружба» колхозö буретш вайисны тайö пемöсъяссö да колiсны уджалысьяс. Эз юасьны, вермас ли оз. И уджалiс пенсия вылö петтöдз, олiс чумын. Велöдчис доддявны кöръясöс, ветлыны нартъясöн, юрнуöдны аргишöн, вурны маличаяс. Уджалiс шойччан лунъяс тöдтöг лун и вой, зэригöн и турöбалiгöн. Пыр верöсыскöд орччöн, кодкöд öтлаасисны 1954 воын да быдтiсны вит челядьöс. Олöма ань озыр морт: сылöн 11 внук-внучка да 18 правнук-правнучка. Быдöн сылы матыс да дона. Овлö, пуксяс налöн кытшö да мойдö-висьталö аслас олöм-вылöм йылысь либö босьтчылö сьывны, мый зэв сьöлöм сертиыс, тöдö ок уна важся сьыланкыв.
Клавдия Константиновналы февраль 1 лунö тырис 90 арöс. Пöся чолöмалiсны районса администрацияöн веськöдлысьöс вежысь Н.А.Чаланова, кодi сетiс президент В.В.Путинсянь чолöмалан гижöд, олöмаяслöн районса котырöн веськöдлысьöс вежысь И.З.Ахмадова, Помöсдiнса юралысь А.Е.Уляшев, олöмаяслöн Помöсдiнса котырöн веськöдлысь М.А.Третьяков да матыссаяс. Быдöнсянь вичмисны шоныд кыв да кыпыд бурсиöмъяс.
Галина НЕСТЕРОВА.

Война пансян воын Анна Степановна Липиналы вöлi 13. Чужанiнас, Емдiн районса Лыатыын, астшöтшъяяскöд уджалiс видзьяс-муяс вылын, отсалiс бергöдны гортса овмöс. Школа помалöм бöрын пырис велöдчыны Емдiнса педучилищеö. Уджалiс Сёськаын да Кониын. Сэсся пырис велöдчыны Коми пединститутö коми кыв да литература велöдысьö. 1954 воын локтiс миян районö.
— Вöзйисны уджавны Леткаын либö Кулöмдiн районын. Леткаö туй эз вöв, а Кулöмдiнö ветлiс пароход. Со и бöрйи Эжва йыв, — казьтылiс олöма ань.
Районса велöдан юкöн ыстiс Улыс Вочса школаö, а во мысти пуктiсны Кебанъёльысь рытъя школаса директорöн. Лунтыр уджалöм бöрын кöть и вöлi сьöкыд, велöдчисны унаöн, урокъяс эз кольлыны.
Сэсся сiйöс вуджöдiсны Донö. Веськöдлiс начальнöй школаöн, сэсся 8 классаöн. Велöдiс и коми кыв да литература. Ставсö уджалiс 33 во.
Донын и аддзис нывбабалысь шуд. 1958 воын öтлаасис шань да зiль Николай Константиновичкöд. Чужтiсны да олöмö петкöдiсны вит челядьöс. Олiсны ыджыд овмöс бергöдöмöн, скöт видзöмöн. Мамлöн кок туйöд мунiсны Светлана да Татьяна. Тамара бурдöдысь, Василий инженер-электрик. Альбина öтнас бокын, Великий Новгородын, вот перъянiнын экономист.
Анна Степановналы февраль 3 лунö тырис 90 арöс. Сiйöс нимöдiс да сетiс Россияса президент В.В.Путинсянь чолöмалан гижöд районса администрацияöн веськöдлысь С.В.Рубан. Шоныд кывъяс висьталiсны олöмаяслöн районса котырöн юрнуöдысь Г.А.Кравченко, республикаса юралысьлöн районын общественнöй примитанiнöн веськöдлысь А.А.Кузнецова, Донса юралысь А.С.Нехоршев, олöмаяслöн Донса котырöн юрнуöдысь Р.А.Липина да мукöд. Велöдан управлениеса начальник О.В.Лебедевасянь аттьöалан гижöд сетiс начальнöй школаса директор Л.В.Захарова.
Гижöд да снимок Марина ДАДАШОВАЛÖН.


Комментарии:

Добавить комментарий

Свежий выпуск: за 18 октября