Быд мортлöн эм сэтшöмин, кöнi чужис да быдмис, велалiс ветлöдлыны, сёрнитны. Менам эм жö сэтшöм местаыс – тайö Вылыс Воч сикт. Сiйö сулалö зэв гажаинын, кыр йылын, а орччöн визувтö ичöтик Воч ю.
Миян сиктным аттö мича, кöть и ичöтик, олöны зэв зiль, уджач йöз. Ассьым чужанiнöс радейта век: тöв и гожöм, тулыс и ар. Гожöмнас позьö ветлывлыны вуграсьны. А кутшöм чöскыд сынöдыс, кор дзоридзалö гöгöрбок. Öтчыд сикт гöгöр гуляйтiгöн аддзылiм визяордаöс, сэтшöм мусаник да мичаник, а вöрас кылö выльöн петöм тшак кöр, сьылöны лэбачьяс, дзирдалö югыд шондi. Ок муса да мича кад, котöртам сэсся купайтчыны, бузгысям да лунтыр ворсам ю дорас, гожйöдчам! Ваыс сöстöм, мича, шоныд; видзöдан да, ичöтик черияс уялöны, миянöс ылöдлöны, суныштан – а некод абу, ставныс разалöмаöсь.
Муса шоныд гожся рытъяс! Найö воöны меным сьöлöм вылö! Кöнкö кöк кöкö, арталö мыйкö, рытъя лэбачьяс сьывны босьтчöны, лэбалö майскöй жук! Петам рытнад да сьöлöм бурмытöдз и котралам.
Воö зарни ар. Мамöкöд радейта ветлыны вöрö вотны тшак. А вöрыс пасьтасьöма, вöччöма! Лунтыр вотчам да öдва гортö и ваям тшаксö, а сьöлöм вылын сэтшöм долыд!
Öнi кöдзыд тöв, усьö небыдик лым, бушколасьö, ывлаыс бара на корö миянöс иславны, вöчны лым чом. Бура и исласям гöра вывсянь! Оз жö öд тайö муса да гажа кадыс помась?!
Тöв бöрын бара на тулыс воö. Окота казьтыштны Серафим Поповлысь кывбурсö:
Котöртлы рас вылö дивöла,
Ловзьöма, шуöны, кор…
Быд мортлöн ловзьö сьöлöмыс, оланногыс; мичмö гöгöр, югдö, окота сьывны, котравны.
Кöсъя шуны, мый абу окота меным мунны аслам чужанiнысь, танi овны век, висьтавны аслам челядьлы, кутшöм миян муса чужан муным, мый сiйö меддона, юр вежöр вошмöнъя!
Арсений Королёв.
Вылыс Воч.