Февраль öтиöд лунсянь райöнса шöр бурдöдчанiнлöн поликлиникаын босьтчисны вöчавны коронавируслöн инфекцияысь прививка. Районö воис вакциналöн 100 доза. Медводз сiйöс вöчöны бурдöдысьяслы.
— Тэрыб отсöг сетан юкöн да висьысьясöс примитанiн, кöнi ме и уджала, меститчöны öтилаын, став висьысьыс мунö миян пыр. Аслым колö видзчысьны коронавирус кöвъялöмысь. Кор юöртiсны вакцина воöм йылысь, пыр жö гижöдчи «Госуслуги» портал пыр. Окота нин пöрччыны тайö маскасö. Чайта да, быдöн кö ачыс кутас тöждысьны аслас дзоньвидзалун вöсна, дугдас сэсся ыджыдавны да лöняс тайö вирусыс, — сёрнитiс прививка медводдзаöн вöчысь Людмила Анатольевна Липина.
Медшöр врачöс вежысь Светлана Ивановна Попова пасйис, мый таво кежлö районлы урчитiсны 833 доза, вакциналöн мöд ыджыд чукöр воас февраль помын либö март панасын. Бурдöдысьяс асьныс тöдöны кöвъясьлiс-ö налы тайö инфекцияыс. Найö, позьö шуны, быд лун пудъясьöны олöмöн, йитöдаöсь висьысьяскöд либö налöн матыссаяскöд, да бытьысь тест отсöгöн туявны инфекциясö.
Вакцинасö сывдöны час джын, тадзи сiйöс позьö видзны кык час. Öти флаконыс урчитöма вит мортлы. Гижöдчысьяс сьöрсьöн-бöрсьöн и пырасны. Медводз быдöнлысь дзоньвидзалунсö донъялö, гöгöрбок видзöдлö терапевт, мерайтас температура да давление. Оз вöчны нöбасьысь аньяслы, 18 арöсöдз челядьлы, да тайö кадын нёрпалысьяслы, да мортсö кö зэвтiс кузя висьöмыс. Бöръя кык вежонын кö кодкö вöлi йитöда коронавирус инфекцияа висьыськöд, бытьысь горшсьыс либö нырсьыс босьтасны мазок. Тест отсöгöн тöдмалöны ас окота серти.
Февраль öтиöд лунö волысьяслы вакциналысь мöд юкöнсö вöчасны стöч 21 лун мысти. Кыдзи висьталiс терапевт Владислав Николаевич Матвиюк, «Госуслуги» портал да поликлиникалöн регистратура пыр медводдза лун кежлö гижöдчис 14 морт. Медсестра вöчö вакцина, да час джын на видзöдöны мортлöн дзоньвидзалун бöрся.
Бурдöдысьяс бöрын шымыртасны велöдан да социальнöй юкöнын, олöмаяслöн да вермытöмъяслöн Югыдъягса керкаын уджалысьясöс да с.в.
Талун вакцина вöчöны сöмын поликлиникаын, районса ылi бурдöдчанiнъясö ветлöм могысь шöр бурдöдчанiн мöвпалö босьтны вакцина новлöдлан, 18 градуссянь кöдзыд кутан термоконтейнер.
Марина Дадашова.
Снимок гижысьлöн.